ÁNUHIT sámi áirasiid fasmáhccat
Dál ánuha Davvi Dearvvašvuohta sámi áirasa guoktá, Gunn Heatta ja Knut Johnsena, fas máhccat Sámi dearvvašvuođasiida prošektii.
Dán rádjái lea Finnmárkku buohcciviessu jođihan Sámi dearvvašvuođasiidda prošeavtta, mii galgá huksejuvvot Kárášjohkii ja fállat riikkaidgaskasaš dearvvašvuođabálvalusaid sápmelaččaide.
Dan prošeaktajoavkkus leaba SÁNAG jođiheaddji Gunn Heatta ja spesialistadoavttir Knut Johnsen ovddastan sámi beroštumiid. Soai leaba geassádan prošeavttas go oaivvildeigga ahte sudno oaivilat eai gullon ja mearrádusaid dahke sudno haga.
Maŋŋebárgga maŋŋá gaskabeaivve deaivvadii sámediggeráđđi ja Davvi Dearvvašvuohta čoahkkimis Romssas, gos fáddá lei earet eará Sámi Dearvvašvuođasiida.
– Sámedikki mielas lea hui dehálaš ahte Gunn Heatta ja Knut Johnsen máhccaba fas prošektii ja ahte sudnos galgá leat váikkuheapmi dasa. Dál ii leat sámi ovddasteaddjit prošeavttas, nu ahte sihke Sámediggi ja Davvi Dearvvašvuohta dáhtošedje sudno fas ruovttoluotta bargojovkui, dadjá sámediggeráđđeláhttu Lars Filip Paulsen (Olgešbellodat).
Balus prošeakta maŋŋona
Lars Filip Paulsen lohká dál lea dehálaš ahte Davvi Dearvvašvuohta oažžu fas dásseárvvu prošektii ja ahte Sámi Dearvvašvuođasiida duohtandahkkojuvvo.
– Mii leimmet bovden iežamet čoahkkimii Davvi Dearvvašvuođain, digaštallat Sámi dearvvašvuođasiidda prošeavtta. Mii leamašan balus ahte prošeakta maŋŋona ja go leamašan váilevaš sámi váikkuhusat proseassas. Min intenšuvdna lea oažžut ruovttoluotta dásseárvvu prošektii ja ahte prošeakta galgá duohtan šaddat, dadjá sámediggeráđđelahttu Lars Filip Paulsen.
Gáibádusat fertejit čuovvoluvvot
SÁNAG jođiheaddji Gunn Heatta lohká alddis eavttuid jus galgá mieđihit searvat fas daidda bargguide, nu ahte son ii leat vuos mearridan searvá go.
Váldogáibádus lea ahte Davvi Dearvvašvuohta galgá jođihit prošeavtta, dadjá Gunn Heatta. Son deattuha ahte lea máŋga eará gáibádusat mat maid fertejit čuovvoluvvot, muhto diet lea dat váldo gáibádusat. Dál lea ge Finnmárkku buohcciviessu mii jođiha prošeavtta.
Heajos gulahallan sivvan stuibmái
Sámediggeráđđelahttu Lars Filip Paulsen mielas orru Davvi Dearvvašvuohta áddemin váttisvuođaid ja orru mielas gávdnat čovdosiid.
– Ledje positiiva ja mielas gávdnat buori čovdosiid hástalusaide mat leat čuožžilan. Sis lea seammá dáhttu go mis, ahte prošeakta galgá duohtandahkkojuvvot ja fálaldat galgá leat nu buorre go lei álggus jurddašuvvon. Dál lea dehálaš čađahit buori proseassaid ja gulahallama, seammás go loktet fas luohttámuša gaskal Finnmárkku buohcciviesu ja SÁNAGA, Jáhkán unnán luohttámuš lea okta sivva stuibmái mii lea čuožžilan, loahpaha Lars Filip Paulsen.
Eat ožžon ságáide
Davvi Dearvvašvuođas ii lean ge oktage gii sáhtii kommenteret ášši, sivvan dasa lei go gulahallanolbmot ledje čoahkkimis ikte.