Dáiddár Britta Marakatt-labba oažžu dán jagáš John Savio-bálkkašumi
Dáiddár Britta Marakatt-labba oažžu dán jagáš John Savio-bálkkašumi.
Jurys ledje dáiddárat Lena Stenberg ja Joar Nango, ja vel DavviNorgga Dáiddamusea konservator Charis Gullickson. Iežaset čilgehusat deattuha jury ahte Britta Marakatt-labba lea leamaš dehálaš olmmoš sámi, norgga ja ruoŧa dáiddamáilmmis olu jagiid.
– Son lei oassin Máze-joavkkus 1970-logus, mii lei dehálaš sámi kultur-, dáidda- ja identitehtalihkadus. Marakatt-labba lea leamaš ja lea ain pioneara guhte gállá ođđa luottaid eará sámi dáiddáriidda, ákkastallá jury preassadieđáhusas.
Searvvai Documenta14:s
Muitaleapmi lea váikkuhan Marakatt-labba dáidaga motiivaválljejumiide ja govaide. Dán jagi searvvai son dovddus Documenta 14 kulturriemuide Kasselis, Duiskkas, «Historjá» govain, mii leat 24 mehter govdosaš sákkaldatgovva sámi historjjá birra. Dáidaga dábálaččat beassá oaidnit Tromssa universitehteas.
– Erenoamáš gudni
– John Savio lei sámi govvadáidaga ovdavázziid searvvis, ja danne dovdo erenoamáš gudnin oažžut dán bálkkašumi, lohká Britta Marakatt-labba.
Garra barggu bokte lea sámi govvadáidda ovdánan rivttes guvlui davviriikkain, oaivvilda son.
– Dat ii leat nuvttá boahtám, muhto lea gáibidan garra barggu ja jáhkku dasa mainna olmmoš bargá, lohká son.
Vuoiti oažžu 150 duhát ruvnno Bildende Kunstneres Hjelpefondas.
Bálkkašupmi geigejuvvo DavviNorgga Dáiddamuseas Tromssas, čakčamánu 21. beaivvi diibmu 19.00. Marakatt-labba dáidagat čájehuvvojit seamma museas golggotmánu 21. beaivvi rájes.