Ii searvva ođđasit prošektii, nu guhká go hilgo jagi barggu
Knut Johnsen ii loga searvat Sámi Dearvvašvuođa Siida prošektii dál, ja lasiha ahte ii leat ožžon jearaldaga ge.
Mannan bearjadaga ságastii spesialistadoavttir Knut Johnsen ja SÁNAG jođiheaddji Davvi Dearvvašvuođain. Johnsen lohká dušše gulahallan leamašan makkár gáibádusat sudnos leat, ii ge loga ságastallan ahte soai galgaba máhccat fas prošektii.
– In leat gullan maidige munno gáibádusas. Jagi bargu lea mannan duššás go eai hálit joatkit barg- guid, muhto baicce leat mearridan álgit ođđasit ja dan in sáhte dohkkehit. In boađe searvat fas prošektii nu guhká go eai sáhte dan ollašuhttit, lohká Knut Johnsen.
Hilgon jagi barggu
Knut Johnsen gáibádus lea ahte vuođđoplána galgá joatkašuvvot, muhto nu guhká go dan eai mieđit de lohká váttis boahtit ruovttoluotta prošektii.
– Min sápmelaččaid plánaid leat hilgon ja leat amputeren fálaldaga, dan in (eat) sáhte mieđihit. Nu go dál lea dilli de leat badjelgeahččan 20 olbmo barggu, go fáhkkestaga bálkestit dan čilgehusa haga. Mu mielas lea dat badjel bávtte dahkku, duššin dahkan min bargguid mat leat heivehuvvon vuođđojurdagii Sámi Dearvvašvuođa Siidii, lohká Knut Johnsen.
Ii jáhke maŋemuš sánit daddjon
Son dattetge lea giitevaš go Sámediggi áŋgiruššá áššis.
– Muhto dattetge in jáhke maŋemuš sátni lea daddjon dán áššis, loahpaha Knut Johansen.