Biehttalit guhkes vuordináigi beassat buhcciidruktui
Kárášjoga gielda biehttala ahte sis leat guoktenuppelogis vuordimin saji buhcciidruktui.
Norgga viidosaš tv-kanála, TV2, dat lea guorahallan ja iskan buot gielddaid Norggas. Dan guorahallamis leat gávnnahan ahte olles Norggas leat 2101 olbmo geat dárbbašit saji buhcciidruovttuide, dát lea sihke guhkit ja oanehut áigái. Leat sihke boarrásat ja nuorra olbmot geat dárbbašit saji, buohccit ja borasdávdabuohccit.
Guovdageainnus ja Porsáŋggus vurdet viđas saji buhcciidruktui, Divttasvuonas fas okta. Kárášjogas fas leat 12:s geat dárbbašit saji, mii lea measta beannot geardde eambbo go Guovdageainnus ja Porsáŋggus. Daid čieža eará sámegielhálddašanguovlluin ii leat oktage vuordimin saji.
TV2 dieđuid mielde leat Kárášjogas viđas geat dárbbašit guhkit áigái saji buhcciidruovttus, ja leat čiežas geat dárbbašit saji fuolahusvistái ja ollesáigge divššu.
Guhká leamašan váttisvuohta
Amund Peder Teigmo lea Guovddášbellodagapolitihkkár Kárášjogas ja miellahtu Kárášjoga boarrásiidráđis. Son jurddaša maid gielda áigu bargat dainna váttisvuođain, ja namuha ahte sii leat jo mannan geasi oaidnán mo dilli sáhttá šaddat.
– Lea guhká leamaš dát váttisvuohta, muhto lea maŋimuš jagiid lassánan dat dárbu. Mii leat dieđusge áigá oaidnán ahte nu geavvá, ja leat dieđihan ahte dál lea áigi dahkat juoga, muhto sii eai leat vuoruhan dán, muitala Teigmo. – Mii dáhpáhuvvá singuin geat eai oačču saji buhcciidruktui? – Ferte ruovttubuohccedivššu bokte oažžut veahki, go ii oačču saji buhcciidruovttus, muhto dalle ii oačču dan ollislaš divššu nu mo leat ohcan, muitala Teigmo.
Eai vuorut boarrásiid
Amund Peder Teigmo muitala ahte gielddas eai leat doarvái ruđat.
– Dat ii leat ruhta eambbo sajiide, dán áigodagas leat vuoruhan sámi dearvvašvuođa párkka ja dulvesihkkarastima eará guovlluin. In dieđe maid muđui leat vuoruhan, muhto eai oro gal vuoruheamen daid boarrásiid, muitala Teigmo.
– Eai oro berošteamen
Kárášjoga boarrásiidráđđi maiddái bargá dainna áššiin, ja sii mieđihit ahte leat unnán bargit. Ávvir lea čállán ášši dán birra ovdal.
– Boarrásiidráđđi lea evttohan ahte dárbbašuvvo 1,5 miljovnna ruvnnu čoavdit unnán bargiid váttisvuođa, ja dat lea dušše dat váttisvuohta. Boarrásiidráđđi lea gáibidan maŋimuš raportta gielddas dán rádjái. Boarrásiidráđđi ii leat ožžon makkárge raportta mo dainna bargguin manná. Boarrásiidráđi báhpáriiguin oidno ahte mii leat ovddidan ášši, ja sádden dan gildii. Ii oro stivrejupmi berošteamen boarrásiid dilis, muitala Teigmo.
Vikarbyrå lea divrras
Boarrásiidráđi jođiheaddji Brita Kåven oaivvilda ahte Vikarbyrå, maid Kárášjoga gielda geavaha, máksá menddo olu.
– Gielddalaš jođiheaddji muitalii čoahkkimis ahte Vikarbyrå golut leat ollu, go dat máksá jahkái vihtta miljovnna ruvnno. Dát mearkkašivčče logi fástavirggi. Dalle eai sáhte báikkálaš olbmuid virgádit go lea šiehtadus dainna Vikarabyråain. Vikarbyråain lea šiehtadus, in dieđe man guhkes áigái, ja dat lea ain doaimmas. Mii leat viggan juohke sajis bargat dan ožžodit eret. Lean maiddái gullan ahte leat máŋga báikkiolbmo, dahje sámegielhálli geat ohcet virggiide, muhto eai vuoruhuvvo almmolaš virggiide, muitala Brita Kåven.
Kåven oaivvilda soaitá leat dárbu ahte eaktodáhtolaččat veahkehit buoridit dili.
– Máŋga gielddas leat dakkár eaktodáhtolašbargit geat veahkehallet, ja mun áiggun maid geahččalit dien láhkai, muitala Brita Kåven.
Čoavdán váttisvuođa
Kárášjoga ráđđealmmái Kurt Maurstad muitala ahte gielda lea dál čoavdán váttisvuođa. Son čuoččuha ahte TV2:Š guorahallamis eai leat rievttes logut sin gieldda ektui.
– TV2:Š lea menddo bajás bidjan loguid, in dieđe gos ležžet ožžon dáid dieđuid. Diet leat boares ođđasat. Min logut eai leat nu stuorrá. Mis leat čiežas mat leat ásahussaji ohcan. Dál leat muhtimat ožžon saji dan rájes go TV2:Š čálii ášši, ja muhtumat leat oažžumin saji. Leat 2-3 saji rabas dál. Leat guokte vai golbma fuolahusvistti saji rabas dál. Leat maid guokte lanja maid leat geahččaleamen rahpat, muhto diesa maiddái dárbbaša olbmuid. Eat mii sáhte rahpat ovdal go fágaolbmot leat sajis. Dat gal buorrána, mis gal baljo ii leat ge vuordin áigi šat. Leaš go ba šat vuordináigi go mii dáid čađahat, dadjá Kurt Maurstad.
Čoahkkin dán vahkku
Maurstad muitala ahte sisaváldinráđđi mearrida geasa vuoruhuvvo sadji, ja sis lea čoahkkin dán vahkku.
– Sisaváldinráđis leat doaktárat ja buohccidivššárat, mun in dieđe sihkkarit geat čohkkájit doppe. Galggašii jo mannan vahkku čovdon dát ášši, muhto doavttir šattai fáhkkabuohcci veahkehit, dalle šadde maŋidit čoahkkima, muitala Maurstad.
– Politihkkár Amund Peder Teigmo muitala gielda ii leat vuoruhan ruđaid boarrásiidda, maid don jurddašat dán birra?
– Dat gal ferte leat Amund Peder Teigmo duohken diet, mun gal in sáhte álgit kommenteret maid politihkkárat dadjet. Dien fertejit politihkkárat vástidit, muitala Kurt Maurstad.
– Boarrásiidráđis fas daddjo ahte hui olu ruhta golahuvvo Vikarbyråai, dan sadjái go báikkálaš olbmuid virgádit, lea go duohta? – Mii eat leat dán jagi baljo geavahan Vikarbyråa. Mii leat dál oanehis áigái čakčat geavahan moadde buohccidivššára Vikarbyråas, go eat fitne buohccidivššárii. Mis leat muhtimat geat leat luomus, muhtimat geain lea virgelohpi. Nu ahte ledjet boahtimin ruovttoluotta. Mii geavahat báikkálaš olbmuid nu guhkás go sáhttit, loahpaha Kurt Maurstad.