Geahččalančájáhus rahppo Mázes
Rdm-guovdageainnu gilišillju bovde čájáhussii maid musea lea ráhkadan Álttá-akšuvnna historjjálaš dieđuid ja ávdnasiid vuođul ja gohčodan «Dokumentašjonssenter La elva leve». – Dat galggalii govvet dakkár guovddáža mii sáhtálii leat Mázes, lohká gilišillj
Rdm-guovdageainnu gilišillju bovde čájáhussii maid musea lea ráhkadan Álttá-akšuvnna historjjálaš dieđuid ja ávdnasiid vuođul. Dieđut ja dáidagat leat vižžon Riddoduottarmuseaid (RDM) vuorkkáin. Dokumeanttat ja dávvirat leat luoikkahuvvon Álttá museas ja ođđa duođaštusat leat dahkkon jearahallamiid ja filmmažiid bokte. Rdm-guovdageainnu gilišillju museahoavda Johan Aslak Haetta muitala dát geahččalančájáhus lea boađus sin álgoprošeavttas ásahit duođaštanguovddáža Mázii.
– Čájáhusa Mázes gohčodeimmet «Dokumentašjonssenter La elva leve». Dat galggalii govvet dakkár guovddáža mii sáhtálii leat Mázes mii muitala Áltá-akšuvnna historjjá. Seammás sáhtálii leat báiki gos dološ aktivisttat deaivvadit, gos eambbo dieđuid duođaštit ja báiki gos mii muitalit dáid áššiid birra vai bohtet albmosii. Dehálamos midjiide lea gaskkustit daid dáhpáhusaid, lohká museahoavda Johan Aslak Haetta.
Sotnabeaivvi, čakčamánu 24. beaivvi, tiibmu 18.00 rahppo čájáhus «Dokumentasjonssenter LA ELVA LEVE» Mázes Ove Varesentera kafeás.
Mázejoavku
Sámi Dáiddaguovddáža (SDG) direktevra, Jan-erik Lindström, lea heivehan čájáhusa. Álttáakšuvnna áiggi riegádii Mázes sámi dáiddajoavku, Máze joavku ja das lei Aage Gaup, Josef Halse, Berit Marit Haetta, Britta Marakatt-labba, Hans Ragnar Mathisen, Rannveig Persen, Synnøve Persen ja Trygve Lund Guttormsen rohki mielde. Oassi Máze joavkku dáidagiin ja maiddái eará luoikkahuvvon dáidda čájehuvvo.
Ollislaš dokumentašuvdna váilo
Čájáhusa ulbmil lea govahallat makkár Máze Dokumentasjonssenter sáhtášii leat. Musea čalmmustahttá earret eará daid olmmošlaš beliid ja eará váikkuhusaid Álttá-guovdageainnu bođu huksemis Čávžžus.
– Dan ii dieđe ovdal go dat ráhkaduvvo man dárbu dasa lea, muhto okta mii lea hui čielggas, lea ahte visot dán akšuvnna bealit eai leat dokumenterejuvvon. Bohtosat eai leat dokumenterejuvvon ja dat lea juoga maid galggalii dahkkot. Nubbi lea ahte sáhttet buktit dárbbašlaš bargosajiid Mázii go dát lea okta daid dáhpáhusain mii lea bidjan Máze kártii ja das ii boađe mihkkege. Dát historjá lea báhcán rabasin, joatká museahoavda Johan Aslak Haetta.
Olbmuid muitalusaid, historjjálaš dokumeanttaid, govaid, filmmažiid, dalá mediaid govahallamiid, dávviriid ja dáidagiid bokte muitalit dán historjjá. Muitalusaid muitaleaddjit leat sihke Máze olbmot, politihkkárat, vuostálastit ja earát.
Váilu boađus
Rdm-guovdageainnu gilišillju museahoavda Johan Aslak Haetta muitala dokumentašuvnna čohkkenbarggus leat olbmot muitalan áššiid mat ovdal eai leat muitaluvvon.
– Jus doppe lea velá eambbo olbmot geat bohtet iežaset historjjáin, de soaitá šaddat eambbo ollislaš govva das. Lea maid bealit mat eai leat loktejuvvon almmolašvuhtii. Nugo makkár ovdamunit ledje go dulvadedje Álttá/guovdageainnu eanu. Mii diehtit dieđusge ahte ruhta lea boahtán sidjiide geat leat elrávnnji vuovdán, stáda ja Álttá gielda lea ožžon vearroruđaid. Leat go earát dinen das. Lea go doppe leamaš buhtadusat boazodollui, diekkár áššit eai leat velá dokumenterejuvvon. Nubbi lea fas, lea go politiija hui fasttit gieđahallan daid vuostálastiid geat doppe ledje? Ii dat ge leat goassege albma láhkai boahtán ovdan, čilge Johan Aslak Haetta ja deattuha sin dehálamos oassi lea gaskkustit mii dáhpáhuvai dalle.
Čájáhusáigodat: 25.-26.9. 9:0018:00 ja 27.9.-8.10. 12:00-18:00. Lea gaskaboddosaš čájáhus ja prošektii leat ohcamin lasi ruđa vai beassat joatkit háhkat dieđuid.