Hárjehallagoht sevdnjes geallá
Go Guovdageainnu suohkan mearridii vuovdit Guovdageainnu musihkkáriid hárjehallanvisttiid, lohpidedje gávdnat eará vistti sidjiide. Dál leat fas gávdnan vistti musihkkáriidda, ja sii besset hárjehallagoahtit fas.
Guovdageainnu musihkkarsearvi ja eará musihkkárat leat 2003 rájes atnán Bredbuktnesveien 12, dahje «Bátnedoaktárvistti» hárjehallamiidda. Dál go Guovdageainnu suohkan lea mearridan vuovdit vistti, ja musihkkáriidsearvvis ii leat ráđđi oastit dan, de sii leat leamaš hárjehallanvistti haga.
Lohpiduvvon ođđa visti
Vuovdima oktavuođas lohpidii suohkan ođđa hárjehallanvistti musihkkáriidda.
– Lea suohkana ovddasvástádus láhččit dili musihkkáriidda, ja danne maid ordnet midjiide vistti gos beassat hárjehallat, dadjá Guovdageainnu musihkkáriidsearvvi jođiheaddji, Heaika Haetta.
Jotket hárjehallamin gealláris
Geassemánu 30. beaivvi lei vuosttaš čájáhus dan bivnnuhis «Bátnedoaktárvistis», ja dan rájes maid leat musihkkárat biddjon eret vistis. Dál lea viimmat čielgan gos musihkkárat besset joatkit hárjehallamin.
– Suohkan lea fállan midjiide kulturviesu geallára, dahje nuoraidsiidda, gaskaboddosaš hárjehallanlatnjan. Ii leat gal dat buot buoremus čoavddus, go geallir han lea geallir. Mii leat ovdal hárjehallan doppe, 30 jagi dás ovdal, ja doppe lea gal vejolaš hárjehallat, nu ahte mii birgehallat, čilge Haetta. Vaikko mieđiha ahte ii leat dat buot buoremus visti gos hárjehallat, de son lea duhtavaš.
– Lea hui positiiva go suohkan fállá midjiide vistti gos beassat hárjehallat. Suohkanis eai leat nu olu vistit, nu ahte lea hui positiiva go leat gávdnan midjiide vistti, lasiha son.
Ovdánahttit sámi musihka
– Dán rádjái lea Guovdageaidnu leamaš kulturoaivegávpot. Jus dát namahus galgá ain bistit, de ferte juoga dahkkot, oaivvilda Haetta.
– Musihkka ii eale iešalddis, erenoamážit sámi musihkka. Mii fertet gal bargat dan badjelii ahte dat galgá ain ovdánit, dadjá son. Haetta čilge ahte sámi musihkka lea nu rašis dilis, ahte lea bággu dahkkot juoga.
– Jus mii eat bargga juoga doalahit min musihka sámi giliin, de sáhttá dat jávkat, ja boahtá olgoriikamusihkka sadjái. Mađi unnit aktivitehta, mađi eambbo unnugoahtá min musihkka, lasiha son.
Unnán vuoruhuvvon
Vaikko musihkkáriin dál lea visti, gos besset hárjehallat, de eai geahča dan eará gaskaboddosaš čoavddusin.
– Mii leat badjel logi jagi juo hárjehallan guohcagan visttis, nu ahte gal dat juo muitala man olu musihkka lea vuoruhuvvon. Vaikko leat duhtavaččat gaskaboddosaš hárjehallanvisttiin, de ii leat buorre guhkit áiggi doppe hárjehallat, čilge Haetta.
Sávvet dili buorránit
Dál sávvá Haetta buohkaid geahččat ovddasguvlui, ja dat ferte dahkkot vai Guovdageaidnu bissu ain kulturoaivegávpogin. – Musihkka lea lihka dehálaš go ovdamearkka dihte valáštallan suohkanis, loahpaha son.
Ávvir ii lihkostuvvan oažžut kommentára suohkana bealis ovdal deaddileami.