Skuvlamánát vázzet mánnui

Miehtá riikka skuvlamánát gilvalit dál geat vánddardit skuvlii buot eanemus birasseasti vuogi mielde. Vuosttaš guovtti vahkkus gilvvus, leat mánát vázzán 257 177 km. Kampánnja namma lea «Beintøft» ja ulbmil lea seastit birrasa. Birasageanttat leat álggahan kampánnja, ja dainna áigot hástalit skuvlamánáid vázzit, sihkkelastit dahje kollektiivvalaččat vánddardit skuvlii. Badjelaš 1 480 luohká leat mielde gilvvus, ja eambbo go 35 000 oahppi.

– Mihttun lea unnidit Co2-suođđama maid biillat luitet, lohká Birasageanttaid Hanna Hågensen Aasen.

– Go unnit váhnemat dolvot mánáideaset skuvlii, de eai čuožžil lihka olu váralaš dáhpáhusat johtolagas, mánáin buorrána foarbma ja leat vuokŋasat skuvllas. Ja buot deháleamos, mánát sáhttet váikkuhit rávisolbmuid gáhttet birrasa. Mánát berrejit beassat mearridit movt áigot skuvlii johtit, lohká Aasen.

Vázzet mánnui ja fas ruovttoluotta

Oahpaheaddjit registrerejit gaskamearálaš gaskka man oahppit vázzet. Mihttun lea vázzit 768 000 kilomehtera, lihkká guhkki go máilmmis lea mánnui, ja fas ruovttoluotta. Dássážii leat mánát vázzán 70 proseantta mátkkis mánnui.

– Lea somá čuovvut ovdáneami, ja lea maid miellagiddevaš oaidnit man olu Co2-luoitima seastit go nu olusat vázzet, lohká Aasen.

– Ja šaddá somá oaidnit guhkás mánát leat ollen go gilvu nohká, leat go mánus, ollen máilbmái, vai das gaskkas juoga sajis, loahpaha Aasen.