Ii lean dulka álbmotčoahkkimis
Ságadoalli Ohcejoga gielddas Ilmari Tapiola ii ádden mii daddjui álbmotčoahkkimis ja son lohká dáid elfápmolinjjáid maid leat plánen čađa Ohcejoga gieldda, mielddisbuktá ahte masset olu guohtoneatnamiid.
Ságadoalli Ohcejoga gielddas Ilmari Tapiola lei boahtán oasálastit álbmotčoahkkimii Sirbmái ja ii ge ádden olus maidige mii daddjui čoahkkimis, go NVE gii lei bovden álbmoga čoahkkimii, ii lean virgádan sámegielat dulkka.
– Go ii lean dulkojuvvon sámegillii de in gal ádden maidige mii daddjui. Dat lea viehka ártet go lea dákkár gulahallandilálašvuohta, gos olbmot eai gulahala ja álohii rábmojit ahte Norgga stáhtas lea nu olu ruhta, muhto dattetge ii leat dan veardde ruhta ahte ii leat dulka dákkár čoahkkimis. Dat lea viehka badjelgeahččanvuohta sápmelaččaide, dadjá Ohcejoga ságadoalli Ilmari Tapiola.
Beanta unohas
Maiddái NSR presideantta evttohas Aili Keskitalo reagerii garrasit ja son lea cealkán NVE:I ahte berre lágidit ođđa álbmotčoahkkima, gos buohkat besset seamma eavttuin leat mielde.
– Mu mielas orru beanta unohas go dat bohtet deike sámi gilážii ja sámi hálddašanguvlui, ja eai leat smiehttan ahte sii áigot sápmelaččaide hupmat ja sámiiguin gulahallat. Dat muitala veaháš sin máilmmigova birra, ahte sis ii leat dárbu gulahallat báikki olbmuiguin ja sii leat mahkáš doallan nu máŋga gulahallančoahkkima ja eai goassige vásihan ahte dárbbašit dulkka, dat muitala sin ovttagielat oainnu birra, lohká son.
Orru dego stáhtat leat juo soahpan
Tapiola lohká dáid plánaid gal orrot stáhtat juo soahpan ja ahte álbmotčoahkkimat leat dušše dakkár formálalaš doaimmat maid fertejit čađahit.
– Mu mielas gal orru dan láhkai ahte stáhtat leat juo soahpan huksegoahtit ja dál lea dušše dakkár gulahallandilálašvuohta. Dál leat jo Suoma bealde plánemin stuorra elfápmolinnjá mii manná Ohcejogas mátta Supmi, dáid álbmotčoahkkimiid dollet dušše vai leat formálalačča, ja de eai šat das beroš eambbo maid mii dadjat, lohká Ilmari.
Stuorra guohtoneatnamat jávket
Ohcejohkii lea 44 kilomehtera Leavvajogas, gosa leat plánen dáid elfápmolinjjáid mat galget boahtit bieggamillopárkkas ja rasttildit rájá Ohcejohkii ja das viidáseappot mátta Supmii.
– Dát ii atte midjiide ii maidige, dušše doalvu bargosajiid. Dát linnjá govdodat lea 100 mehtera govddu ja váldá olu guohtoneatnamiid. Lea 7 miilla Ohcejogas gitta Anár gieldda rádjái, dat doalvu viehka stuorra guohtoneatnamiid. Mu mielas orru Romssa bealde leat badjeolbmot caggan dáid stuorra elfámolinjjáid ja eai dohko beasa hukset dáid, muhto fertejit Supmii buktit dan rávnnji ja Suoma čađa jođihit dan, lohká Ohcejoga gieldda ságadoalli Ilmari Tapiola.
Norgga čázádat- ja energiijadirektoráhta (NVE) bieggafápmojođiheaddji Arne Olsen šállošii go sii eai lean virgádan dulkka álbmotčoahkkimii.