– VÁIVI OAIDNIT daid bilideame
Mánu áigi buvttii Grieg Seafood fitnodat luossabiebmanrusttegiid Porsáŋgguvutnii. Dál leat buktán juo guliid, ja biebmagoahtán daid. Dat váivvida báikki olbmuid.
Grieg Seafood nammasaš fitnodagas leat luossabiebmanrusttegat miehtá Norgga. Dál leat bargagoahtán daiguin maiddái Porsáŋgguvuonas, gos ovdal ii leat leamaš dákkár.
Ihte fáhkka
Ingunn Utsi orru Reihvágis, sullii 1,5 kilomehtera eret dain rusttegiin. Son oaidná daid juohke beaivve go guovlala láseráigge olggos iežas ruovttus. Dat váivvida su.
– Geasset mii beasaimet gullat ahte fylkkamánni lea addán lobi buktit daid luossabiebmanrusttegiid deike Porsáŋgguvutnii. Ii mannan ge guhkes áigi ovdal bukte juo sihke daid rusttegiid, guliid ja biebmagohte daid, čilge Utsi.
Ballá guolit jávket
Utsi lea persovnnalaččat hui vuostá dása. Son bargá áššiin ja geahččala bissehit dan, muhto ii leat vuos lihkostuvvan.
– Mii diehtit ahte vilda guolit eai oro doppe gos dákkár rusttegat leat. Dat duolvvidit mearabotni, mii dagaha ahte guolit guđđet báikki, dadjá son.
Utsi joatká čilget ahte Reihvágis, Vedbottenis, mearas lea garra rávdnji.
– Dat dagaha ahte visot dat kemikálat, medisiinnat ja biepmut maid doppe bálkot daidda guliide, mannet dan garra rávnnji mielde. Rávdnji han de doalvu daid viidáseappot Porsáŋgguvutnii, jogaide, gos váikkuha eará guliide, čilge son.
Galggašii ráfáiduhttit
Utsi muitala ahte Porsáŋgguvuotna lea leamaš okta dain moatti vuonas gos dákkár ii leat vel leamaš. Son váivahuvvo go dál leat váldán vel dán ge vuona.
– Sii geat leat addán lobi dákkár hommáid deike buktit, oaivvildit ahte dat lea nu guhkkin mearas ahte ii daga maide. Muhto nu ii leat, go mearra goit nuoskiduvvo, dadjá son. Su mielas galggašii goit okta ráinnas vuotna.
– Mu mielas galggašii Porsáŋgguvuotna ráfáiduhttot. Okta vuotna goit galggašii ráinnas, vai oaidnit ahte mii dáhpáhuvvá vuonain, lasiha son.
Sádden reivve fylkkamánnii
Utsi gii ieš lea persovnnalaččat dán vuostá, reagerii dalán go gulai ahte áigot dákkár rusttegiid buktit su ruovttubáikái, ja sáddii váidaga gildii. Dál son lea ain vuorddašeame vástádusa, ja ahte juoga galgá dahkkot áššiin.
– Vástádussan álggos bođii čuoččuhus ahte eai leat boahtán vuosttaldeamit, mat fertejit boahtit jus mihkke galgá dahkkot, čilge son. Son lasiha ahte su reive lea dál mannan fylkkamánnii, ja ferte beare vuordit ja oaidnit mii dáhpáhuvvá.
– Mii leat golbma olbmo geat orrut dáppe lahkosis gos dát biebmanrusttegat leat, ja midjiide lea hui váivi dušše geahččat láseráigge ja oaidnit ahte billistit, dadjá Utsi.
Duođašta váidagiid
Fylkkamánni seniorráđđeaddi, Harald Muladal, duođašta ahte leat boahtán váidagat Porsáŋgguvuona luossabiebmanrusttegiid vuostá.
– Movt dáinna áššiin manná, ja mii loahppaboađus šaddá, eat dieđe vel, dadjá son.
Mánu áigi buvttii Grieg Seafood nammasaš fitnodat luossabiebmanrusttegiid Porsáŋgguvutnii. Dál leat buktán juo guliid, ja biebmagoahtán daid. Dat váivvida báikki olbmuid.