Olusat buoridan iežaset vuodjanáiggiid
Kárášjoga vuodjansearvvi gilvovuodjamii, Skábmavuodjan 2017, bohte badjelaš 200 vuoddji. Olu vuoddjit muitalit sii leat buoridan iežaset vuodjanáiggiid mealgadit ovddit olahusaid ektui.
Kárášjoga Vuodjansearvi lágidii logát geardde Skábmavuodjamii mannan vahkkoloahpa, skábmamánu njealját ja viđát beaivvi. Badjelaš 200 vuoddji ledje boahtán Kárášjohkii Ruoššas ja Norggas gilvvohallat. Dáid vuodjamiidda leat olu nuorat sihke nieiddat ja gánddat garrasit hárjehallan, okta sis lea Aleksey Koriachko Johansen gii vuodjá Kárášjoga vuodjansearvvi ovddas, muhto ássá Leavnnjas.
– Vudjen goalmmát vuoru mii lei čeallunvuohki (butterfly). Vudjen bures iežan mielas, vaikko in lean dása hárjehallan dán maŋimuš vahkku. Lean buoridan eanaš vuodjangaskkain iežan áiggi, lohká 14 jahkásaš Aleksey Koriachko Johansen.
Muitala sus lea miella ovdánit velá eambbo vai nagoda vuodjat johtilabbot. Su hárjeheaddji lea Kárášjoga vuodjansearvvi hárjeheaddji Kjetil Andersen.
– Nu guhká go Kjetil Andersen leamaš mu hárjeheaddji de lean ovdánan dađistaga. Son diehtá maid bargá, lohká Aleksey Koriachko Johansen ja muitala son vuojai sotnabeaivvi golbma gaskka ja velá sáttavuodjama ja lávvardaga vuojai ges njeallje gaskka ja sáttavuodjama velá.
Rámida hárjeheaddji
Váhnen Julia Johansen lea dás oktan isidiin, soai vuojiheaba Aleksey golbmii vahkkui Kárášjohkii vai beassá hárjehallat, muhtumin njelljii. Čilge ahte Kjetil Andersen lea hui čeahpes hárjeheaddji ja danin sii háliidit leat Kárášjoga vuodjansearvvi miellahtun.
– Vaikko Ruošša vuodjit leat fali vuodjat, de lea Aleksey eanaš háve vuoitán sin badjel. Vaikko
juohke háve vuoddjit 15 miilla ovddos maŋos, de buktá dat bohtosiid. Lea hirbmat buorre go liiko valáštallat ja go nu áŋgirit bargá, de ferte váhnen su doarjut, muitala Julia Johansen.
Dohkálaš bohtosat
Kárášjoga vuodjansearvvi hárjeheaddji Kjetil Andersen lea čužžon vuojadanáldása bálddas ja čuvvon mielde mo searvvi nuorra vuodjit vudjet ja movttiidahttán ja rávven ovtta nuppi.
– Lea mannan bures, dát vuodjamat. In leat áibbas duđavaš daid guhkkit gaskkain, muhto sivva dasa lea go vuojadanáldás leamaš gitta vahkku ja massiimet olu dán gilvvohallamii vuodjanhárjehallama. Dáid oanehabbo gaskkain manai hirbmat bures ja dat mat ledje veaháš guhkit gaskkat lea maid dohkálaš áiggi dáfus, čilge Kjetil Andersen.
Buoridii iežas áiggi 13 sekunddain
– Alfhild Beate Vuolab, riegádan 2002:s, vuojai hirbmat bures 200 mehter medley. Buoridii iežas ovddeš olahusa 13 sekunddain. Son vuojai maid hirbmat bures 100 mehter čealluma, rápmo Kjetil Andersen.
– Ii oro measta duohta ahte lean vuodjan 13 sekundda buorebut ovddit gilvvohallama rájes. Orru dego niehku. Mun leamaš ovdal nu njoahci. Soaitá leat nu ahte mii leat dál eambbo hárjehallan, lohká Alfhild Beate Vuolab ja moddjá.
Buoridan iežaset bohtosiid
13 jahkásaš Lone Charlotte Eikjok vuojai bures sáttavuodjamis, bohte goalmmádin.
– Mu mielas manai bures dat sáttavuodjan, muhto measta mii massiimet dan vuoittu go guovt- tis mis measta vulggiiga árat go lei lohpi. Na, moai Mariealain, lohká Lone Charlotte Eikjok ja lohká son liiko buoremusat vuodjat 1500 mehtera ja 400 mehter medley.
Son muitala son dáid gilvvohallamiin lea vuodjan johtileabbo go ovdal ja lea oalle duđavaš bohtosiiguin. Nu lohket maid dat eará golbma vuoddji sáttavuodjanjoavkkus: Stine Lise Nordsletta Somby, Julia Somby, Mariela Nordsletta Somby.
Boahtte áiggi vuodjit
Maŋimuš áigi Skábmavuodjamiin lei várrejuvvon nuoramus vuddjiide, geat besse leat mielde, muhto eai gilvvohala vuos. Dievva mánát oktan váhnemiiguin ledje boahtán dáid vuodjamiidda. Earret eará dát Kárášjoga vuodjansearvvi ovcci jahkásaš nieiddat: Jana Linnea Sara Gulsrud, Henriette Nilsen, Eva Liisa Nystad Leite, Birgitte Kotisen Henriksen, Christel Johansen, Elise Kotisen Henriksen geat jerre nu čábbát beassat aviisii.
Ruošša vuoddjit buoremusat
Vuoddjit ovddastedje Kirkonjárgga, Hámmárfeastta, Álttá, Nordlysbyen, Tromssa, Leavnnja, Finnsnes, Čáhcesullo, Báhcavuona vuodjanservviid ja Ruošša Apatity, Poliarny, Zapoljarny vuodjanservviid. Buoremus vuoddjit ledje Ruošša nieiddat/nissonat ja gánddat/albmát.