Árvvoštallagoahtán OKTASAŠ SÁMEDIKKI ÁSAHIT
Norgga Sámiid Riikasearvi lea álggahan proseassa mii sáhttá rievdadit buot sámedikkiid, sihke Norggas, Suomas ja Ruoŧas. Boađusin sáhttá šaddat oktasaš Sámediggi ja oktasaš válggat.
Norgga Sámiid Riikasearvi lea álggahan proseassa mii sáhttá rievdadit buot sámedikkiid, sihke Norggas, Suomas ja Ruoŧas. Boađusin sáhttá šaddat oktasaš Sámediggi ja oktasaš válggat.
Ávvir lea maŋŋel Norgga sámediggeválgga dán čavčča čállán ahte áirrasjuohku livččii áibbas eará ládje muhtin bellodagaide jus livččii seamma válgaortnet go Stuoradikkis, namalassii dássádahttináirasiid juohkin.
Vahágin gaskalepmosii
Martin Rimpi rehkenastimiid mielde livččii Árja ožžon golbma áirasa Sámediggái, ii ge dušše ovtta, nu go dál dagai. Guovtti stuorámus bellodahkii, Norgga Sámiid Riikasearvái (NSR) ja Bargiidbellodahkii, livččii ges stuorámus vahágin jus livččii dat áirrasjuohkin. NSR ovttas NSR/SÁB:IN livččii massán guokte áirasa ja seamma maid Bargiidbellodat. Čájehuvvo ahte gaskageardán bellodagat, nu go Árja, vuoittáhallat dálá válgaortnegiin. Árja leage áigon gáibidit rievdadit válgaortnega.
Sámediggepresideanta Aili Keskitalo (NSR) ii leat áigon dušše dássádahttináirasa rievdadit, muhto geahčadit olles válgaortnega ođđasit.
Hukset oktasaš Sámedikki
NSR parlamentáralaš jođiheaddji Runar Myrnes Balto lohká dál NSR váldit dien hástalusa. Muhto dan sadjái go dušše rievdadit válgaortnega, de jurddašit sii vel dobbeliidda.
– Mii NSR bealis eat áiggo hilgut dan jurdaga rievdadit válgaortnega, muhto geahččat ášši vel stuorábun dan válgaortnega ektui. Mii han leat juo searvan válggaide dainna ja maiddái bidjan dan «Muohtačalmmiid» julggaštussii, ahte áigut álgit proseassa geahččat lea go vejolaš hukset oktasaš Sámedikki.
SPR juohká mandáhta
Myrnes Balto lohká sin bidjame johtui oktasaš ja rájákeahtes sámi bargojoavkku mii galgá árvvoštallat oktasaš riikkaidgaskasaš Sámedikki ja nu maiddái oktasaš válgabeaivvi. Das galget leat miellahtut buot sámedikkiin. Dál leat Norgga, Suoma ja Ruoŧa sámedikkiin iešguđet válgaortnegat. Sámi parlamentáralaš ráđđi, mii lea golmma sámedikkiid oktasaš lávdegoddi, galggašii addit mandáhta dan lávdegoddái formálalaččat doaimmahit guorahallanbargguid. lea go vejolaš ja movt ásahit oktasaš sámedikki,
Myrnes Balto lohká sis eanetlogu Sámedikkis doarjut dán árvalusa. Boahtte dievasčoahkkimis juovlamánus jáhkká son sin loktet ášši vuos Sámediggái.
– Eat dieđe leat go návccat vuodjit guovtte geardde dákkár proseassa, go sáhttá leat áddjás proseassa geahčadit válgaortnega. Mii gal baicca váldit olles dan proseassa oktanis. – Manne háliidehpet oktasaš Sámedikki? – Go mii leat oktasaš álbmot, eai ge riikaráját berreše leat hehttehussan midjiide. Galggašii okta álbmotválljejuvvon orgána mii ovddasta min buohkaid, muhto leat dievva hástalusat ovdal go boahtit nie guhkás. Muhto mii háliidit dál álggahit dan barggu. Lea goit vuosttaš lávki oktasaš orgána guvlui, dadjá son.