Tráhppie soaitá fertet giddet uvssaid

UBMI: Sámi kulturguovddáš Tráhppie soaitá fertet heaittihit doaimmaset heajos ruhtadili geažil. Maŋŋel kulturoaivegávpot 2014-daoimmaid, de lea Ubmi sámesearvi rahčan ekonomiijain. Sin dienas lea unnon badjel 40 proseanttain ja leat ferten unnidit bargoveaga beliin. Dál lea maiddái Tráhppie guovddáš eahpesihkkaris dilis. Dat sáhttá heaittihuvvot dan geažil.

– Mis lea beare unnán ruhta oažžut gežiid oktii, 2014 rájes leat bággehallan cealkit beali min bargiin eret, dadjá Ubmi sámesearvvi nubbijođiheaddji Lena Nilsson SVT:I. Sii leat dán jagi geahččalan ohcat stáhtalaš doarjaga Västerbotten guovllu bokte, Stáhta kulturráđis ja Sámedikkis, muhto eai leat ožžon dan ruđa maid ohce. Ođđajagemánus fertejit juo mearridit nagodit go joatkit doaimmaiguin.

– Stáhta livččii galgan ain čájehit beroštumi maŋŋel 2014, go jus dan mađe doarjja livččii dál, de nagodivččiimet ain doaimmahit viidáseappot, dadjá Nilsson SVT:I.