– Olu mii ferte vuos čielggaduvvot

Ruoŧa Sámedikki politihkalaš njunuš, Per Olof Nutti, ii áiggo goit vuosttaldit jurdaga ásahit oktasaš Sámedikki ja oktasaš válggaid. Muhto olu lea su mielas ain eahpečielggas Ruoŧa bealde.

Sámedikki stivrra ságadoalli Per Olof Nutti (Sámiid Riikkabellodat) lohká buorren jurddan ásahišgoahtit oktasaš Sámedikki, ja su mielas lea lunddolaš ásahit de oktasaš válgabeaivvi maid.

– Dieđusge váldá áiggi oažžut oktasaš sámedikki, muhto dat oažžu leat ulbmil ja mihttu bargat dan guvlui. Mii leat oktasaš álbmot ja ovttalágán barggut ráđđehusaid vuostá iešguđet riikkas, go leat iešguđet lágat ja ortnegat. Livččiimet nannoseappot ja fámoleappot, dadjá Nutti.

Oktasaš áššit

Son jáhkká oktasaš Sámedikki livččii buktán čovdosa RuoŧaNorgga boazoguohtunsoahpamuša ođasteapmái, mii lea bisánan juo logi jagi áigi, ja jáhkká dat livččii leat ávkin maiddái Norgga ja Suoma sámiid oktasaš guolástanrahčamušaide Deanus.

– Dávjá lea ruhtadili čuolbma go eai buot sámedikkit beasa ovddidit álgoálbmotáššiid. Danne livččii dehálaš ahte livččii oktasaš oaidnu omd Ovttastuvvan Našuvnnaid, ON, bokte. Ja go Ruoŧas ja Suomas ii leat dohkkehuvvon Ilo-soahpamuš, de livččii dehálaš oktasaš Sámedikki bokte oažžut riikkaid vuolláičállit dan, dadjá son.

Nutti jáhkká gal oktasaš Sámedikki leat amas jurddan Ruoŧa beali sápmelaččaide, ja leat máŋga ášši maid ovddemus ferte čielggadit.

– Dieđusge ballet, go Ruoŧa bealde Sámis lea gažaldat vuos čearuid siskkobealde, movt addit daidda olbmuide vejolašvuođa váikkuhit mat leat olggobealde čearuid, vai dat eai hehtteše boazodoalu rivttiid. Lea oainnat ballu ahte sin oaidnu ja sin jietna ii šat gullo. Ruoŧas ferte vuos dan čuolmma čoavdit, ja dat sáhttá leat hehttehussan dán ollislaš prosessii, dadjá son.

Váillaha ođastusa

Nutti mielas galggašii ge dán fáttás geahččalit sámedikki lága ođđasit hábmet.

– Ferte rievdadit Sámedikki lága das geas galgá leat lohpi jienastit. Lea dieđusge váttisvuohta go ii sáhte guorahallat lea go ođđa jienasteaddji sápmelaš vai ii. Dás lea hui stuora bargu oktiibuot mii ferte dahkkot. Ii ge das boađe boađus dán áigodagas ii ge boahtte. Ferte dál álgit bargat, muđui ii ollašuva goassege, dadjá Nutti.

maritelin@avvir.no