Gávnnai iežas vuosttaš skohter «Elana»
Kárášjohkalaš ja boazosápmelaš John Idat Anti fuomášii soaittáhagas diibmá ahte su vuosttaš skohter ain lei čavddis.
1979/80 dálvvi osttii John Idar Anti áhčči skohtera gándii. Dalle lei Mázes Ski-doo skohterfitnodat ja Elan lei buoremus skohter dan áigge. Son muitala iežas hui rámis leamašan go fidnii skohtera ja dál lea rámis go lea fas ožžon oastit dan ruovttoluotta 36 jagi maŋŋá go vuvddii dan.
– Vudjen guokte dálvvi dainna ja lonuhin dan ođđa skohteriin Fanasgiettis, dalle lei doppe skohterfitnodat. In lea dan rájes smiehttan dan skohtera birra, ovdal go mannan dálvvi, go mus oahpis ohcalii nama skohtera vuodjinkoarttas (nuppi oasis) go eaiggát áiggui registreret skohtera. Nu čájehuvvui ahte lei áhči namma ja skohter maid munnje osttii go ledjen 16-jahkásaš, muitala John Idar Anti.
Somá ja erenomáš
– Lea hui somá, ja lea hui erenomáš go lea ain ortnegis ja vulggii vuosttaš ravgemis. Gii dan lei jáhkit, lohká John Idar Anti, guhte mannan duorastaga finai viežžamin skohtera Hámmárfeasttas.
Muittut, ii vuovdde
John Idar Anti muitala skohter leamašan 30 jagi Ålesunda guovllus ja maŋemuš jagi leamašan Hámmárfeasttas ovdal go dál fas lea Anti hálddus.
– In leat jurddašan vuovdit dan, go lea hui somá muittašit. Jus goassege oaččun mánáidmánáid, de han lea hui somá čájehit makkár skohter ádjás lei go lei nuorra, čaimmiha Anti.
Hui giitevaš
John Idar Anti ii čiegat ahte lea sakka hirpmástuvvan ja ilus go lea ožžon fas skohtera iežas háldui, ja lea hui giitevaš go ovddeš eaiggát vuvddii dan sutnje.
– Hui buorre dovdu dál go skohter lea mu šiljus. Skohter lea justa seamma láhkai oaidnit go dalle go jávkkai Kárášjogas, ja lea hui somá, dadjá son.
Lasihan fámuid
Ski-doo mearkkat Elan vuvdui 12 heasttat mohtoriin, muhto John Idar muitala iežas lasihan fámuid dasa, ja lea dál 15 heasttat skohter.
– Dan áige lei dat mášen, čaimmiha son.