Sámi festiválat ovttasbargagohtet
Sámi festiválat deaivvadit Oslos odne. Sii plánejit deaivvadit oktii jahkái vai besset juogadit iežaset čehppodaga ja vásáhusaid sámi musihkka- ja kulturlávddiid birra, mat sáhttet leat veahkkin effektiviseret ja buoridit sámi festiválaid sisdoalu ja ekon
Sámi Musihkkafestivála, Márkomeannu, Riddu Riđđu, Raasten Rastah ja Beskán Luossa Rock áigot lágidit čoahkkimiid, semináraid ja bargobájiid dán jagáš Kulturráđi jahkečoahkkima oktavuođas Oslos.
Prošeavtta deaivvadanbeaivvit Oslos leat skábmamánu gávccát beaivvis gitta logát beaivái, čuožžu čállon prošeavttagovvádusas. Márkomeanu buvttadeaddji Anne Henriette Reinås Nilut lea ovttas Sámi Musihkkafestivála buvttadeddjiin Ol Johan Gaupain hábmen plána ja ožžon prošeavtta julggiid ala.
Márkomeannu organisere dan praktihkalaš oasi ovttas Sámi Musihkkafestiválain ja Sámediggi máksá de Márkomennui.
Háliidit deaivvadit oktii jahkái
Festiválaid plána lea deaivvadit oktii jahkái.
– Ii dárbbaš gal Oslos dáhpáhuvvat, muhto heive hui bures dán háve go dat festiválat aŋkke leat vuolgimin dohko Kulturráđi konferánssa oktavuođas, muitala Márkomeanu buvttadeaddji Anne Henriette Reinås Nilut.
Niluha mielas lea dehálaš ahte festiválat deaivvadit jahkásaččat, vai besset čoahkkanit ja gulaskuddat.
– Soaitit maiddái ovttasbargat ja oahppat nubbi nuppis. Mii han buohkat bargat sámi kultuvrra ovddas, ja diehttelas leat mis olu áššit maid birra berret ságastit, muitala Nilut.
Soitet ovttasbargat prošeavttain ja buvttademiin
Festiválat áigot jurddašit háliidit go ja lea go vejolaš ovttasbargat prošeavttain ja buvttademiin. Festiválat jurddašit ovddidit ja loktet sámi artisttaid, musihka ja juoigama, jurdda lea ahte go aktevrrat barget ovttas, de sáhttet ráhkadit stuorát prošeavttaid mat olahit eambbo olbmuid. Ubmejen Biejvieh, Riddu Riđđu ja Sámi Music Week (Áltá) gal oassálastet, ja Karasjok festivaler ja Ijahis Idja leat bovdejuvvon.
– Lea vejolaš álggahit prošeavttaid ovttas, muhto ii leat daddjon ahte dáhpáhuvvá. Ovttasbargu álo álgá dainna ahte ferte gulahallat ja deaivvadit. Ovttasbargu hui dávjá nanne, ja sáhttet stuorit bargguid dahkat jus eambbosat servet, muitala Nilut.
– Buoridit go dát deaivvadeamet sámi festiválaid boahtteáiggi?
– Mun jáhkán visot mii máilmmis dahkkojuvvo áŋggirdemiin ja ráhkisvuođain lea buorre, loahpaha Nilut.