Oktasaš sámedikki ásaheapmi áddjás bargu
Norgga Sámiid Riikasearvvi (NSR) parlamentáralaš jođiheaddji Runar Myrnes Balto dadjá ievttá Ávviris, ahte sii NSR bealis áigot geahččat válgaortnega ollu stuorábun go dušše dássádahttináirasiid juohkima. Myrnes Balto lohká sin bidjame johtui oktasaš ja rájákeahtes sámi bargojoavkku mii galgá árvvoštallat oktasaš riikkaidgaskasaš Sámedikki ja nu maiddái oktasaš válgabeaivvi. Das galget leat miellahtut buot sámedikkiin. Dát ášši vuolgá das go Ávvir maŋŋel sámediggeválgga dán čavčča lea čállán dan birra, ahte áirrasjuohku livččii áibbas eará ládje muhtin bellodagaide jus livččii seamma válgaortnet go Stuoradikkis, namalassii dássádahttináirasiid juohkin.
Ávvira iskkadeapmi čájehii ge ahte Árjja lei válggaid vuoittáhalli, go sámediggeválggas ii leat dássádahttinortnet. Sii livčče ge beassan dakkár ortnegiin sisa golmmain áirasiin, ii ge dušše ovttain. Seamma iskkadeapmi maiddái čájehii, ahte NSR ja Bargiidbellodat dat vuoittáhallet jus ásahuvvo dássádahttináirrasjuohkin sámediggeválgii maid. Danne ii soaitte nu imaš go NSR háliida ollu «stuorábun» jurddašit sámediggeválgga rievdadeami go dušše Norgga beale sámediggeválgii lasihit dássádahttinortnega. Sis baicce lea miella ásahit oktasaš sámedikki buot sámiide ja oktasaš válgabeaivvi.
Iešalddis hui buorre jurdda ásahit oktasaš sámedikki, muhto dan diehtá NSR seamma bures go buohkat, ahte dákkár stuora sámediggeválgarievdadeapmi lea hirbmat áddjás bargu.
Iešalddis hui buorre jurdda ásahit oktasaš sámedikki, muhto dan diehtá NSR seamma bures go buohkat, ahte dákkár stuora sámediggeválgarievdadeapmi lea hirbmat áddjás bargu. Duostat dadjat, ahte dakkár rievdadeapmi ádjána unnimusat 10-20 jagi ovdal go dat šaddá duohtan, jus oba šaddá ge duohtan. Eat sáhte jáhkkit dasa, ahte Norgga beale sámediggeválgga ii sáhte rievdadit vaikke dakkár áddjás bargu biddjo johtui ahte ásahit oktasaš sámedikki. Das lea sáhka dáhtus, ahte divvut Norgga beale sámediggeválgga vai dat šaddá vuoiggalaččabun.
Árjja lea ge dieđihan ahte sii loktejit dán ášši juovlamánu dievasčoahkkimii, muhto orru dál juo čájehuvvome ahte eanetlohku, mas NSR lea njunnošis, dan gomihit. Dat goit lea áibbas čielggas, ahte juovlamánu dievasčoahkkimis beassat oaidnit maid duođaid dat guokte stuorámusa, NSR ja Bargiidbellodat, oaivvildit dán áššis. Ahte lea go sidjiide deháleabbo doalahit fámu iežaset duohken ovdalii go rievdadit válgaortnega mii ii leat dál demokráhtalaččat dohkálaš. Ja dalle eai berre čiehkadit «oktasaš sámedikki ásaheami» prošeavtta duohkái, mii ii dáidde šaddat duohtan buoril. Danne han ferte ge geahčadišgoahtit dál Norgga beale Sámedikki válgga dainna jearaldagain, ahte doaibmá go dat dál govttolaččat.