Biire loahpahan futsalráidočiekčama
Vihtta dievdojoavkku galge deaivvadit Ávanuoris go vuosttaš futsal ráidočiekčamat galge čikčot. Finnmárkku spábbačiekčanbiire lea beahtahallan go dušše guokte joavkku bohte.
Guhkit áiggi lea leamaš váttis sajáiduhttit futsala Finnmárkui. Dál lea biire dolkan.
Bidjan návccaid ja áiggi duššái
Vihtta dievdojoavkku livčče galgat deaivvadit Ávanuoris go futsal ráidočiekčan galggai álggahuvvot dán dálvái. Dušše guokte joavkku dan viđa joavkkus ledje boahtán.
– Vahát go eai váldde dan duođalažžan. Mii leat bargan olu diimmuid oažžut dán jagáš ráidočiekčamiid johtui, ja de eai boađe joavkkut. Lean duššái bidjan návccaid ja áiggi. Dákkár hommáide mis ii leat áigi, dadjá Finnmárkku spábbačiekčanbiire Rune Haugseth Altapostenii.
Loahpahit ráidočiekčamiid
Maŋemus vahkkoloahpa golggotmánus galggai vuosttaš čiekčanvahkkoloahppa dievdduid bealis. Dušše ruovttujoavku Ávanuorri ja Deanu čiekčit ledje boahtán.
– Norild dieđihii ahte eai sáhte searvat buozalmasvuođa geažil. Dasto dieđihii Guovdageaidnu ahte sii eai searvva eará go ovttain joavkkuin, eai ge guvttiin, nu mo álggos ledje lohpidan. Go čiekčamat galge álgit, de ii lean oktage Guovdageainnus boahtán. Boađus šattai nu ahte Ávanuorri ja Deatnu čikče moadde čiekčama vuostálaga, go juo ledje doppe. Danne leat mearridan loahpahit ráidočiekčamiid dievdduid bealis, duođašta Haugseth, gii lei sádden golbma duopmára Ávanuorrái dubmet lávvordatčiekčamiid.
Nissoniid bealis jotket
Álttá, Guovdageainnu ja Ávjju nissonjoavkkut servet ráidočiekčamii dán dálvvi. Sii čikčet iežaset vuosttaš čiekčamiid Guovdageainnus, skábmamánu 12. beaivvi. Dievdojoavkkuide dađi bahábut, soaitá ráidočiekčan nohkan oalát.
– Eai áiggošii oalát heaittihit futsala, muhto leat eahpesihkkarat áigot go geahččalit šat ráidočiekčamiid. Mii fertet geahččalit hutkat juoga ođđasa ja oaidnit lea go vejolašvuohta dagahit dan bivnnuhin. Soaitit sáhttit lágidit ovdamearkka dihte Finnmárkku meašttirgilvvuid ovtta vahkkoloahpa. Nubbi vejolašvuohta lea hilgut seniorjoavkkuid ja vuoruhit nuoraid. Doppe orro beroštupmi olu stuorát futsalii, dadjá son.