– Sáhttá nohkat

Sámi oahppolihttu rektor ballá ahte jus ná joatká, sáhttá dá leat sámi rávesolbmuidoahpahusa loahppa.

Sámi oahppolihtturektor, Heaika Haetta, ii leat duhtavaš evttohusain maid ráđđehus dál lea buktán. Maiddái son oaivvilda ahte sáhttá gártat beare heajos ruhtadilli.

Heajos váikkuhus

Haetta muitala ahte doarjaga unnideamis leat heajos váikkuhusat sidjiide.

– Dát váikkuha sihke olbmuide ja servodahkii. Dát dagaha ahte mii fertet veahá justeret iežamet kurssaid. Juogo fertet divrudit kurssaid, mii lea vahát olbmuide geat háliidit searvat kurssaide, dahje juo fertet unnidit kurssaid , lágidit unnit kurssaid go dán rádjái leat dahkan, čilge son.

Haetta muitala ahte sii juohke jagi leat atnán visot ruđa mii lea juolluduvvon sidjiide, nu ahte sidjiide ii leat juolluduvvon badjelmeare olu ruhta.

Sáhttá nohkat

Go doarjja veahá unnu, ii vuos váikkut nu olu. Muhto go jagis jahkái sáhttá vel šaddat unnit, de sáhttet šaddat stuorát váikkuhusat go dušše unnit kurssat.

– Loahpas soaitit fertet unnidit hálddahusa maid. Loahppaboađus soaitá šaddat vel dat ahte šaddat juo heaittihit visot, ja dát fálaldat nohká. Dás leat váikkuhusat buot sámi guovlluide, go dá lea fálaldat maid ohcalit miehtá sámi, loahpaha SOL rektor, Heaika Haetta.