Tevdnen ráfišiehtadanmuitalusa
Kárášjoga skuvlla guđát luohká tevdnenjoavkkus lea tevdnenčájáhus Kárášjoga girjerádjosis. Oahppiguovttos Ravn Mathias Sara Gulsrud ja Aleksander Haugli Rasmussen leaba tevdnen ráfišiehtadallama oktasaš tevnnegii.
Kárášjoga girjerádjosis rahppui mannan maŋŋebárgga Kárášjoga skuvlla guđát luohká tevdnenčájáhus. Lea duodje- ja tevdnenjoavku, oktiibuot 11 oahppi, geat leat ráhkadan govaid lino-deaddilanvugiin, málen ja sárgon tevnnegiid.
11-jahkásaš Ravn Mathias Sara Gulsrud ja Aleksander Haugli Rasmussen leaba sárgon oktasaš tevnnega. Ravn Mathias muitala son lea gurot ja olgeš beali tevdnen ja Aleksander fas tevdnen dan mii lea gasku.
– Dás lean tevdnen ruvkemašiinnaid ja dihtoriid ja olbmuid mat fuolahit barggu, čilge Ravn Mathis Sara Gulsrud.
– Dieid kanovnnaid fuomášin tevdnet go oidnen daid Boom Beach -spealus, muhto duoid helikopteriid ja girdiid lean ieš tevdnen. Moai letne soađi tevdnen. Dá čohkkán mun ja duo lea Ravn, ja moai letne mahkáš ráfi šiehtadeamen. Letne oaidnán Syrias lea soahti, čilge Aleksander Haugli Rasmussen.
Soai muitaleaba ahte láveba veaháš čuovvut mielde mii dáhpáhuvvá Syria guovllus ja leaba ádden ahte olu mánát dien guovllus leat manahan skuvlavázzima soađi dihtii. Háladettiin soai muitába ammes Norga han leamaš mielde nuppi máilmmesoađis.
Hirpmástuhtti alla dássi
Kárášjohkalaš Martin Pope láve fitnat dáiddačájáhusrahpamiin dávjá.
– Mu mielas gal dolle olu dáidagat seamma dási go daid maid muhtimin oaidná Dáiddaguovddážis. Lea duođaid hirpmástahtti sihke hápmi ja dan maid sii leat sárgon. Ledje govven sihke abstrákta ja konkrehta hámiid. Hirbmat fiinnis ja hirpmástuhtti, lohká eallilan olmmoš Martin Pope.
Barggánis joavku
Oahpaheaddji Randi Olstad muitala ahte oahppit leat dán vuoru oahppan geavahit iešguđetlágan ránes ivnniid.
– Dát joavku lea hirbmat barggán, eai leat vuollánan dalán, muhto joatkán barggu ja loahpas šaddá buorre. Lean hirbmat duđavaš ohppiiguin go ii oktage sis leat ovdal vadjan linoleuma. Oahppit leat geahččalan prentet máŋgii, divvon ja joatkán fas, dassái go duhte bohtosiid. Lea maid dehálaš ahte oahppit besset čájehit maid sii leat ráhkadan ja gullat maid earát go mun lohket sin dáidagii. Ohppiide lea dat dehálaš, lohká oahpaheaddji Randi Olstad.
Váttis seaguhit ivnniid
Emma Katja Anti Persen čájeha gova masa lea málen dievva sárgáid. Nuppi seaidnái lea darvvihuvvon su čáhppes-vilges linodeaddileapmi mas lea sárgát. Guovdu gova lea vadjan bustávaid EKAP mat leat su nama ovdabustávat.
– Lean ráhkadan lino-deaddileami. Mun háliidin bidjat govvii iežan nama ja hervet dan birra amas ii šatta nu goiddas. Lean vuosttaš háve ráhkadan dákkár lino-deaddileami, čilge guđát á luohkkálaš Emma Katja Anti Persen.
– Dán nuppi govas leat iešguđetlágan ránes ivnnit. Lei váttis seaguhit daid ivnniid go in diehtán makkár ivnnit ráhkadit dan ránes ivnni. Dien ránes ivdnái lean geavahan čáhppes ja alit ivnni ja duos čáhppes ja čuvgesruoksada, joatká Emma Katja Anti Persen.
Muitala son liiko hui bures tevdnet ja seaguhit ivnniid. Buoremusat liikui son lino-deaddileapmái.
Somámus linodeaddileapmi
Ánne Máret Eira Meløy, gii maid vázzá guđát á luohkás, liiko buoremusat lino-deaddileapmi go dat lei su mielas somámus.
– Beassá linoleuma vadjat ja vuoidat dan čáhppes málain. Mis lea skuvllas dakkár ráhkkanus ahte beassá linoleuma deaddilit báhpára vuostá, čilge Ánne Máret Eira Meløy.
Muitala sus leamaš ovdal govva čájáhusas, lei «Drømmehus» dahje «niehkodállu» nammasaš govva njealját luohkás.
– Mánát leat čeahpit. In ádde man láhkai dáid lea sáhttán ráhkadit. Ammal dál muitalit mo sii dáid lea ráhkadan. In ge dieđe mii dat lino-deaddileapmi lea, lohká áhčči Nils Jovnna Eira Meløy, gii lea boahtán čájáhusrahpamii.
Tevdnenjoavku oaččui stuorát beroštumi
Kárášjoga skuvlla oahpaheaddji Randi Olstad muitala leat golbma guđát luohká oahppit geat leat juhkkojuvvon golmma jovkui, tevdnen, tekstiila ja duodji. Juohke joavku oažžu 12 vahkkosaš oahpu. Tevdnemis oahppu loahpahuvvo čájáhusain. Dát joavku álggii go skuvla álggii maŋŋá geasseluomu. Eará guđát luohkkálaččat leat maid boahtán čájáhusrahpamii ja ohppiid váhnemat ja fuolkkit. Okta nubbi oahppi fitná Olstadii muitaleamen son boahtá boahtte tevdnenjovkui.
– Dál lea oktiibuot 11 oahppi ja sii vázzet 6. a, 6.á, ja 6. b luoh-
kás. Mun jáhkán dál bohtet eambbo oahppit tevdnenjovkui, lohká Randi Olstad moji.
Muitala dán vuoru lea dát joavku oahppan liántta geavahit, seaguhit ránes ivnniid ja oahppan vadjat linoleumii gova, geahpadit dan čáhppes málain ja deaddilit dan báhpárii govvan. Dát čájáhus lea oaidnimis Kárášjoga girjerádjosis olles kulturvahkku áigodaga.