Sávvet buoret fálaldagaid Oslos
Oslo Sámiid Searvi áigu nannet sámiide fálaldagaid Oslo gávpogis ja Oslo gielda ferte leat mielde, dan bokte bovdejit Oslo gielddapolitihkkáriid álbmotčoahkkimiid.
Oslo Sámiid Searvi lei maŋŋebárgga bovden Sámediggepresideantta Aili Keskitalo ja Sámediggeráđđelahttu Silje Karine Muotka digaštallat gávpotpolitihka Oslo Sámiid Viesus. Oslo Sámiid Searvvi jođiheaddji ja Sámediggeáirras Tor Gunnar Nystad lohká eanet ja eanet sápmelaččat leat fárren gávpogiidda ja danin lea dehálaš geahčadit makkár fálaldagat sápmelaččain lea gávpogiin. Makkár fálaldagat leat mánáidgárddemánáide ja skuvllamánáide, lea go ollesolbmuide fálaldagat, lea go vuorrasiidda fálaldagat ja lea go bearrašiidda fálaldagat.
– NSR lea dat bellodat mas lea buoremus coakcu gávpogiin ja lea hui lunddolaš ahte mii čuovvolit fáttá gávpotpolitihka ja bargat buori politihkalaš barggu dan ektui, dadjá Oslo Sámiid Searvvi jođiheaddji ja Sámediggeáirras Tor Gunnar Nystad.
– Mis lea hui stuorra beroštupmi digaštallat deaivvadanbáikkiid dáppe gávpogis ja maiddái fálaldagaid mat dárbbašuvvojit buoriduvvot dáppe guovddáš gávpogis, dadjá Sámediggeráđđi Silje Karine Muotka.
Oslo gielda ferte mielde loktet fálaldagaid
Deaivvadeamis digaštalle sii mo sámepolitihkkárat Sámedikkis hástalit gielddaid váldit dan ovddasvástádusa. Tor Gunnar ja Silje Karine lohkaba lea dehálaš ahte Oslo gielda lea mielde loktemin Oslo sápmelaččaide fálaldagaid.
– Mii áigut boahtte mánus loktet ášši vel viidáseappot ja áigut lágidit álbmotčoahkkima. Dan oktavuođas mii leat jurddašan bovdet Oslo gielddastivrra politihkkáriid digaštallat sámi fáttáid ja gažaldagaid. Dat mii lea áibbas čielggas lea ahte eanaš gielddain lea ovddasvástádus bálvalit fálaldagaid sámegilli mánáidgárddemánáide, mánáide skuvllas ja dearvvašvuođa bálvalusain. Gield- dain lea hui stuorra ovddasvástádus dien ektui, lohká Tor Gunnar.
– Sámediggi lea lasihan doarjaga Oslo Sámiid vissui. Lea stuorra vejolašvuođat buoridit fálaldagaid, muhto mii fertet oažžut Oslo gieldda mielde ovdánahttit dáid fálaldagaid. Mis lea dál vel hui gáržžes bušeahtta, 10 miljovnna unnit kulturkapihttalis, deattuha Silje Karine.
Bidjan olu návccaid
Tor Gunnar muitala sámi politihkkárat ja searvvit leat bargan máŋga jagi ásahit ovtta sámi institušuvnna mii doaibmá bures. Dál sis lea doaivva ahte dat ođđa Oslo Sámiid viessu boahtá doaibmat bures go leat ožžon ruhtadeami Sámedikkis.
– Mis lea dál hui fokus daid fálaldagaide mii dál lea huksejuvvomin Oslo Sámiid viesus, dat galggašii leat okta deaivvadanbáiki ja okta giellabeassi gos sámegiella geavahuvvo, gullo ja oidno. Doppe galget leat fálaldagat mánáid, nuoraid, ollesolbmuid ja vuorrasiid várás. Dál lea Sámiid viessu beassan Sámedikki ortnegii, nu ahte dál lea vejolašvuohta hukset giellaguovddáža ja bidjat olu návccaid giellaprošeavttaide. Sávan ahte sápmelaččat geat orrot dáppe Oslos fátmmastit dáid fálaldagaid ja leat mielde geavaheamen ja ráhkadit buori doaluid, dadjá Tor Gunnar Nystad.