Dehálaš meannudit boazologuid seamma láhkái
Eanandoalloministtar lea dieđihan ahte leat ráhkadišgoahtán lága mainna sáhttet ráddjet man ollu bohccuiguin sáhttet Ruoŧa beale boazosápmelaččat johttit Norgii. Dasa lea vuođđu go ii leat rádjekonvenšuvdna fámus, nu ahte eanandoalloministtar Jon Georg Dale mielas fertejit vuoruhit ekologalaš ceavzilis boazodoalu. Ruoŧa bealde hálddašuvvo ge boazodoallu eará láhkái go Norggas, go doppe eai leat siidaoasseortnegat ja maiddái eai čađat almmolaš boazolohkamiid nugo Norggas. Ruoŧa bealde raporterejit ieža boazoeaiggádat jahkásaččat man ollu bohccot sis leat ja daid eai dárkkis goasse eiseválddit seamma láhkái go Norggas.
Ii ge dat leat amas ášši ahte rádjekonvenšuvnna guovlluin leat Ruoŧa bealde ollu stuorát ealut go Norgga bealde. Lea dieđus álot dan láhkái, ahte dađi stuorát eallu ovtta guovllus, de dađi eambbo dat čilve ja guorbada guohtumiid. Dat lea áibbas čielggas ahte geassečilvviid alde ii ealit dálvet bohccuid, nu ahte Norgga boazosápmelaččat leat váttis dilis máŋgga guovllus, go sidjiide eai leat sihkkaraston albma dálveorohagat. Danne ii oro gal dán háve Norgga eanandoalloministtar áibbas láhppon go oaidná dárbbu gozihit buorebut Ruoŧa beale boazosámiid, ahte man stuorra ealuiguin dat johtet Norgga beale rittuide geasset.
Das ferte oainnat muitit ahte Norgga bealde leat dutkit guorahallan vissis modealla mielde, man ollu bohccuid guhte ge orohat guoddá. Dan ektui leat dasto mearridan bajimus boazologuid orohagaide máid Norgga bealde boazosámit šaddet čuovvut, jus eai galgga ráŋggáštuvvot. De han ii oro nu endorii maiddái árvvoštallat man ollu bohccuiguin sáhttet guhte ge Ruoŧa beale čearru johttit geasseorohagaide mat leat Norggas. Dat lea goit áibbas čielggas, ahte boazologuid ferte mearridit buohkaide dahje ii oktii ge. Ja jus dan ii leat vejolaš dahkat Ruoŧa beale boazosámiide, de fertejit dan heaitit maiddái Norgga bealde. Seamma láhkái meannudan prinsihpa mielde lea ge dehálaš boazosámiid maid meannudit seamma láhkái, seamma eavttuid mielde, ja dat ii galgga dan duohken makkár riikaássi guhte ge lea.
Ieš alddis gal lea lága álki čállit ja ráhkadit, muhto mot áigot gozihit boazologuid lea eará hástalus. Ii ge dan sáhte eará láhkái dahkat go almmolaš boazolohkamiid bokte. Das dieđus čuožžila jearaldat mot dan áigot dahkat ja goabbá stáhta galgá máksit daid goluid. Oaidnit dál juo ahte dat bealit šaddet váddásat, go Ruoŧa beale ealut eai boađe Norgii duollostašuvnnaid bokte. Danne lea eahpidahtti, ahte ráhkadit lága mainna mearrida boazologuid Ruoŧa beale boazosámiide, lea rievttes vuohki fallehit rádjekonsešuvnna váttisvuođaid. Dáiddášii buoremus, go Norga ja Ruoŧŧa dál čohkkedit birra beavddi dainna mihttun ahte oažžut fápmui ođđa rádjeguohtonkonvenšuvnna.
Dat lea goit áibbas čielggas, ahte boazologuid ferte mearridit buohkaide dahje ii oktii ge.