– Heahtedilis lea giella buot deháleamos
Mannan disdaga lei politiijain vearjoakšuvdna Guovdageainnus, go ledje ohcame dievddu gii lei niibbástallan. Čájehuvvo dál ahte doppe ii lean sámegielat politiija njunnošis go derpe viesuide. Dasa reagere sátnejođiheaddji.
– Mun lean ieš vásihan heahtedilis, ahte in máhttán čilget dárogillii dan maid galgen, nu ipmirdan bures manin lea dehálaš sámegielagiidda, muitala Guovdageainnu sátnejođiheaddji, Johan Vasara, Ávvirii. Son gullá ahte ii lean mannan disdaga vearjoakšuvnnas njunnošis sámegielat politiija, go leat ohcan njealjálotjahkásaš dievddu Guovdageainnus.
Verjejuvvon politiijat
Lei mannan vahkus disdaga go politiijat ožžo dieđu ahte Guovdageainnus galgá leat muhtin njealjátlotjahkásaš dievdu niibbástallan ja nájadan nuppi viđátlotjahkásaš dievddu. Politiijat vulge Álttás vearjjuiguin ohcat dievddu. Gaskavahku iđitija de válde dievddu gitta ja dolvo Áltái. Dan oktavuođas go leat ohcan, de leat leamašan unnimusat njealji viesus ihkku dearpame, vel ovtta guoros viesus ge, gosa bálkestedje gásagranáhtaid ja gaiko olgouvssa, ja nu manne sisa.
Ii sámegielat
Ávvirii duođašta Álttá leansmánnekantuvrras ortnetpolitiijaid juogushoavda, Steinar Aas Andersen, ahte njunnošis ii leat leamaš sámegielat olmmoš go leat viggan daidda viesuide.
– Lei mielde sámegielat, muhto ii lean dat gii njunnošis lei akšuvnnas, duođašta son.
Gulahallan heahtedilis
Johan Vasara lohká ahte ii galgga duššin dahkat dan ahte vaikke olbmot loaittuid hupmet dárogiela bures, ahte leat seamma čeahpi go heahtedilli čuožžila. Vasara muitala rahpasit ahte son ieš lea leamašan dakkár dilis, gos son ii máhttán muitalit dárogillii iežas bákčasa.
– Mus šattai dakkár čoavjebávččas ahte measta meanahuvan. Mu vieččai ambulánsa, doppe gal ledje sámegielagat. Go bohten dearvvašvuođaguovddážii, doppe válddii vuostá mu muhtun gii lei dárogielat. Mun in oba máhttán ge dárogillii čilget iežan bákčasa. Lihkus de lei sámegielat doavttir gii de bođii, ja suinna mun gal gulahallen bures, muitala son.
Eatnigillii
Vasara lohká dán muitalusas lei poeaŋŋa, jus dábálaččat máhttá dárogiela, de sáhttá leat váttis gulahallat heahtedilis.
– Mun goit dovddan ahte máhttán bures dárogiela, ii leat dat, muhto fuomášin ahte ii leat nu álki dárogillii gulahallat go olmmoš lea dakkár dilis, mas mun ledjen. Dan sáhttá maid buohtastahttit dákkár vearjoakšuvnnain. Doppe leat suorganan olbmot, ja muitit ahte politiijain leat albma bissut mat leat láddagasas. Dakkár oktavuođas sáhttá geavvat boastut jus gulahallan ii leat doarvái buorre, sihke politiijaid ja su gaskkas gean leat ohcame, muhto maid politiijaid ja earáid gaskkas, lohká son.
Gulahallan deháleamos
Steinar Aas Andersen, mieđiha Ávvirii ahte gulahallan lea hui dehálaš vearjoáakšuvnna oktavuođas.
– Hui dehálaš lea gulahallan, ja doppe lei sámegielat mielde dan akšuvnnas, muhto ii lean njunnošis. Dat lea duohta ahte gulahallan lea dehálaš, ja erenoamážit dákkár akšuvnnas. Muhto dilli lea nu ahte dalle lei idja, ja mii fertet álot vuolgit daiguin olbmuiguin mat mis leat. Dalle lea deháleamos čoavdit ášši nu bures go sáhttá, ja lea álot son guhte lea buoremusat hárjánan, guhte lea njunnošis. Sáhtán mieđihit ahte sámegielagat leat nu unnán mis, ahte eai leat bálljo oppanassii ge, muhto mis lei mielde sámegielat goitge akšuvnnas, muitala son.
Čoavdit dili lea deháleamos
Guovdageainnu leansmánni, Klemet Klemetsen, lohká ahte go dilli gáibida dan, de ferte dan geahččalit čoavdit vaikke makkár gillii.
– Diehttelasat buoremus livččii jus livččii sámegielat leamaš njunnošis, muhto go nu lea dilli ahte de ii leat sámegielat dakkár gii heive mannat njunnošis, de ferte geahččalit čoavdit ášši buoremus lágiin ja vaikke makkár gillii. Dan oktavuođas dat manai bures ja politiijat čovde ášši nu go galge, lohká son.
Čoavddus
Guovdageainnu sátnejođiheaddjis gal lea čoavddus:
– Ásahit gáiddusoahpahusa Sámi allaskuvlla bokte. Jus sámegielat politiijaid galgá oažžut, dahje obanassii ge sámegiel buohccidivššáriid, dahje eará sámegielat bargiid, de ferte dat oahppu leat váldo sámi báikkis nu go Guovdageainnus. Ii ge ábut viggat sámegielagiid ávžžuhit Osloi dahje Bådåddjui mannat oahpu váldit, go dat gal lea geahččaluvvon ja ii doaimma nu bures.
Guovdageainnus lea dál okta sámegielat politiijabálvá, earret leansmánni Klemet Klemetsen.