Ovccát luohkkálaččat mielde mearrideame bálkkašumi vuoiti
Guovžajávrri nuoraidskuvlla ovccát luohká oahppit besset mielde válljet guđe girji vuoitá Uprisen 2018.
Guovvamánus miessemánnui 2018 giđa, galget ovccát luohká oahppit čieža fylkkas, leat mielde lohkat vihtta girjji ja válljet dan nuoraidgirjji mii vuoitá Uprisen 2018.
Oadjebas oahppobiras
Finnmárkkus lea okta luohkká Guovžajávrri skuvllas beassan mielde doaibmat juryn.
Lea Davvi-norgga Norsk Forfattersentrum, Finnmárkku fylkkagirjerájus ja Lávdi Finnmárku mat leat válljen Guovžajávrri skuvlla fárrui dása.
– Dát lei buorre doaibma dán luohkkái, ja lea hirbmat buorre oahppan- ja luohkkábiras. Buohkat dovdet iežaset oadjebassan, ja lea stuora oassi manne lea nu stuora fágalaš ovdáneapmi luohkás, muitala luohká dárogieloahpaheaddji, Elin Mathisen, gii lea gávccát luohkás juo bargan dán luohká oahpaheaddjin.
Buorre oalgguhus
– Mis leat oahppit geat lohket máŋga girjji mánus, ja muhtumat eai loga nu ollu. Sii illudit lohkat nuoraidgirjjiid mat leat válljejuvvon buoremus girjjiid gaskkas. Go sii dál besset fárus leat mearrideame mii dat buoremus girji lea, de lea dat buorre oalgguhussan sidjiide, dadjá oahpaheaddji ja lasiha ahte oahppit illudit searvat dasa.
Finnmárku lea goalmmát jagi mielde dán doaimmas, ja maŋemus geardde dán vuoru ovdal go lonuhit fylkkaid geat oassálastet girjelohkámii. Uprisen lea doaibma gos nuorat lohket girjjiid ja árvvoštallet daid. Uprisenis leat dušše nuorat mielde, ja sii nammadit daid buoremus nuoraidgirjjiid mat sáhttet vuoitit Uprisen bálkkašumi.
annegro@avvir.no