Olbmot ballet cuiggoduvvomis hánisin – gávppašit badjelmeare
Sii geat dinejit unnimusat áigot golahit 30 proseantta unnit juovlaskeaŋkkaide dán jagi diimmáža ektui, ja sii geain lea miljovdnasisaboahtu áigot golahit 16 proseantta eanet. Ekonoma buktá olbmuide juovlarávvagiid. Ruovttudoalu rávisolbmot, geat dinejit vuollel 400 000 ruvnno, plánejit golahit 2750 ruvnno juovlaskeaŋkkaid oastimii, čájeha iskkus man Yougov lea čađahan Nordea ovddas.
Supmi lea ollu njiedjan diimmáža rájes, go lei 3860 ruvnno. – Erohusat sturrot juovlabasiid oktavuođas, dieđiha Nordea geavaheaddjiekonoma Elin Reitan.
Ruhtagáibideaddji basit
– Sáhttá leat lossa noađđi ollugiidda, erenoamážit mánáide. Ollu sáhttá dahkkot jus humat mánáiguin makkár vuordámušat sis leat juovllaide ja čilget manne ii leat vejolaš buot vuordámušaid olahit, deattuha son. Iskkadeamis boahtá ovdan ahte rávisolbmot, geat dinejit badjel miljovnna, áigot geavahit measta 9000 ruvnno juohkehaš, dán jagi. Dat supmi lea ollu lassánan diimmáža ektui. Dalle lei dát supmi 7600 ruvnno.
– Juovllat leat golaheami ja ruhtagáibideaddji bassi. Ollugiidda sáhttá leat lossat olahit buot vuordámušaid, sihke earáin ja alddis, lohká Reitan.
Gávppašanbákkolašvuohta
Dat gaskamearálaš norgalaš pláne geavahit sullii 5200 ruvnno juovlaskeaŋkkaide dán jagi. Nissonat ja dievddut geavahit sullii seamma ollu skeaŋkaoastimii, muhto iskkus čájeha ahte gaskal 55- ja 65-jahkásaččat golahit beali eanet go sii geat leat gaskal 18 ja 25 jagi boarrásat.
Sii geat dinejit gaskal 400 000 ja 600 000 geavahit 11 proseantta eanet juovlaskeaŋkkaide, muhto sii geat dinejit gaskkal 600 000 ja miljovnna, unnidit golaheami.
Virke árvvoštallá ahte norgalaččat golahit birrasii 10 700 ruvnno juovlamánus dán jagi. 4460 ruvnno manná biebmooastimii, ja 6250 golahuvvo eará gávppiin.
Lossa noađđi
Reitan váruha olbmuid searvamis daidda garra golahemiide.
– Ballu šaddat hánisin earáid mielas, dagaha ahte mii gávppašit vel eanet, ja eambbogiidda, go mii obage dárbbašit, dadjá son. – Dasa lassin bargat garrasit buot vuordámušaid olahit. Eat hálit erenoamážit mánáid beahttit juovlaruohta. Ollugiidda sáhttá šaddat hui lossa noađđin juste dat.
Buktá juovlarávvagiid
Reitanis leat eambbo rávvagat ovdalaš juovllaid: čális skeaŋkalisttu, bija golahanráji, árvvoštala unnidit skeaŋkalogu, ja ale fal oastte skeaŋkkaid kredihtain. – Biebmobálkáseami sáhtát unnidit jus it oastte nu ollu juovlabiepmuid, go rámbuvrrat leat maid rabas juovlabasi ja ođđajagibasi gaskkas, čilge ekonoma. (©NTB)