Biebmobearráigeahčču SÁHTTÁ GIELDIT bargamis elliiguin
Gieldit olbmuid bargamis elliiguin lea okta doaibmareaidu man Biebmobearráigeahčču sáhttá geavahit go dál galget árvvoštallat albmáguoktá duomu ja boahtteáiggi boazoealáhusas.
Vaikko doaibmagildosa čuoččuhus lei váldon eret, de namuhii Hålogalándda Lágamánneriekti liikká oanehaččat doaibmagildosa duomus, mas guokte boazosápmelačča leaba dubmejuvvon verrošan boraspirevahágiin ja rievdadan mearkkaid.
Lágamánneriekti čállá ahte sii eai gávdnan vuođu váldit sudnos eret vuoigatvuođaid. Dattetge lea nu ahte elliidsuodjalusláhka addá láhkavuođu Biebmobearráigehččui gieldit olbmuid, geat leat elliid illastan, bargamis elliiguin.
Finnmárkku Biebmobearráigeahču ossodatjođiheaddji Siv June Hansen ii loga sáhttit olus muitalit maid sii leat árvvoštallamin bargat albmáguoktáin, dál go duopmu lea fámus.
– Lea ráddjejuvvon maid sáhttán muitalit, muhto mii leat meannudeamen áššiid, lohká son.
Doaibmareaidu
Dan veaháš maid Siv June Hansen kommentere, lea ahte lea lihkolaš go duopmu dál lea fámus ja ahte lea áibbas dohkketmeahttun vuohki gieđahallat elliid nu go albmát leaba dubmehallan. Soai leaba dubmejuvvon roavvát biinniidan ealli bohccuid, seammás go leaba gávnnahallan leat sivalažžan rievdadan mearkkaid.
– Mii leat bargamin, muhto min barggut lea suodjaluvvon almmolašvuođas. Sáhtán lohkat ahte min vuolggasadji lea ahte sii, geat dubmehallet roavva daguid dihte, eai galgga beassat bargat elliiguin. Okta doaibmareaidu maid sáhttit geavahit lea gieldit sudno bargamis elliiguin, lohká Finnmárkku Biebmobearráigeahču ossodatjođiheaddji.
Duopmu
Alimusriekti lea hilgon albmáguoktá guoddaleami, ja dál lea Hålogalándda Lágamánnerievtti duopmu gustovaš. Boazosápmelaččat leaba dubmehallan giddagassii ja máksit ruovttoluotta boraspirebuhtadusa, badjelaš 800 000 kruvnna, man leaba ožžon máksot vissis áigodagas. Soai leaba dubmehallan roavvát biinniidan ealli bohccuid, seammás go leaba gávnnahallan leat sivalažžan rievdadan mearkkaid.
Biebmobearráigeahčču lea árvvoštallamin duomu: