ÁRVVOŠTALLET GÁIBIDIT
ruovttoluotta doarjaga musihkkavideoi
Sámediggi juolludii, fargga guokte jagi dás ovdal, sápmelaš beakkán artistii Agnethe Jonsenii dahje «Aggie» 50 duhát ruvnno doarjaga buvttadit musihkkavideo «Icebreaker» lávlagii, mainna lei mielde Eurovision Song Contest lávlungilvvus mii lágiduvvui 2016 jagis Stockholmmas.
Icebreaker musihkkavideo lea buvttaduvvon áigá juo ja almmuhuvvon juo njukčamánu 25. beaivvi 2016s, earret eará Youtubes. Muhto lea maid čájehuvvon ollu eará musihkka arenain.
Gáibidit raporterema
Sámediggi aŋkke ii leat geargan dáinna áššiin. Ovdal juovllaid leat sádden reivve Aggie managerii Stein Vanebo:i mas čállet:
«Sámediggi muittuha ahte áigemearri 25 000 ruvdnosaš loahppadoarjaga máksimii lei 25.04.2017. Doarjaga loahppaoasi máksinduođašteami sáddemii biddjojuvvo loahpalaš áigemearrin 15.12.2017 jos dan galgá oažžut máksojuvvot.
Jos duođašteapmi ii leat joavdan midjiide dán áigemeari sisa, de sihkkojuvvo loahppadoarjja almmá eanet dieđitkeahttá. Dasa lassin sáhttá Sámediggi gáibidit ruovttoluotta máksojuvvot juo máksojuvvon doarjaga.»
– Ferten iskat lagabuidda
Aggie manager dadjá Ávvirii ahte dán prošeavttas leat sii deavdán buorre muddui buot eavttuid, ja musihkkavideo lea beaggán viidát dan rájes go lea almmuhuvvon. Son dadjá iežas jáhkkán ahte sii leat sádden buot raporttaid Sámediggái.
– Dan ferten iskat lagabuidda ovdal sáhtán dadjat eambbo dan birra, muhto jáhkken dan sáddejuvvon Sámediggái, dadjá Vanebo.
Eai gáibit loahppa supmi
Stein Vanebo ii loga áigut iežaset gáibidit máksot loahppa supmi doarjagis mii lea 25 000 ruvnno.
– Vaikke eanaš oasi musihkkavideo buvttadeamis leat olahan, de aŋkke lea báhcán dat oassi ahte aktiivvalaččat promoteret musihkkavideo Eurohpás. Namalassii ahte johtit Eurohpás. Dasa lea sivva go dilli šattai nu mot dat šattai, čilge Stein Vanebo.
– Deavdán buot measta eavttuid
Son liikká dadjá ahte «Icebreaker» musihkkaprošeavttas leat deavdán buot eavttuid, earret go dan ahte johttit Eurohpás promoteret lávlaga.
– Mun áiggun iskat leat go sádden Sámediggái raportta, ja jus dat ii leat dahkkon, de boahtit dan dahkat, dáhkida Stein Vanebo.
– Dábálaččat hui streaŋgat
Sámedikkis duođaštedje duorastaga ahte sidjiide ii leat boahtán vástádus máid leat ohcalan. Sámedikki fágajođiheaddji Johan Matteus Triumf ii loga juste dán ášši birra sáhttit dadjat vuos maide konkrehta.
Dákkár sullasaš čállosat leat maiddái Sámedikkis sáddejuvvon ollu earáide main maid ohcalit raporttaid doarjagiidda maid leat juolludan. Triumf lohká Sámedikki hui streaŋgásat dákkár áššiiguin.
– Dábálaččat gáibidat máksot buot doarjaga ruovttoluotta jus eai leat buot eavttut devdon. Lea hui hárve ahte eat dáhto máksit ruovttoluotta doarjagiid. Liikká lea geavvan ahte eat leat sihtan máksit ruovttoluotta, muhto dalle galgá leat erenoamáš buorit ákkat dasa, muitala Johan Matteus Triumf.
Dán áššis vuos ii hálit maide dadjat ovdagihtii ahte bohtet go gáibidit ruovttoluotta máksot maiddái dan oasi máid leat juo máksán. Olles «Icebreaker» musihkavideo lei bušehterejuvvon máksit 185 000 ruvnno masa Sámediggi lei ge juolludan 50 duhát ruvnno.