Bargu lea buoremus oahpaheaddji
Sámediggeráđđi juolludii ovdal jahkemolsuma 320 000 ruvnno Guovdageainnu nuoraidskuvlii, verddestallanprošektii. Nuoraidskuvlaoahppit galget árbevirolaš máhtu oahppat verdde siidda bokte, gos maid galget beassat oasálastit árbevirolaš bargguide mat gusket boazodollui ja duodjái. Nuoraidskuvlla rektor Ellen J. Sara Eira lohká Ávvirii ahte dáinna juolludemiin bohtet vejolašvuođat oahpahit ollásit árbevirolaš bargguid, ii ge dušše veahá. Skuvla beassá dál eambbo oasálastit olgobargguiguin, ja sáhttet oastit bálvalusaid maid eai máhte skuvllas oahpahit. Ovdamearkka dihtii mo bivvat buolašin. Rektor čilge hui álkit dán ahte sii eai sáhte oahpahit ohppiid movt bivvat. Jus vulget gárdde lusa go buolaš lea, de oahppat galbmot, ja movt ferte nuppes dahkat go lea buolaš. Dan eai sáhte klássalanjas oahpahit.
Ođđajagis álgá skuvla ohcat verdde siidda, geaid bargguid skuvlamánát sáhttet čuovvut. Siida galgá šaddat bissovaš verddesiidan skuvlii, gosa oahppit oktan oahpaheddjiiguin sáhttet mannat oahppat boazodoalu ja verddestallama birra ja oahppat maid verdde bargá boazodoalus. Earret eará garddástallamiid ja niestebohcco njuovvama. Skuvlla bealis čilgejit ahte eai buot oahppit beasa leat mielde boazobargguin, eai ge beasa buot oahppit vásihit jus sii eai oahpat. Skuvlla rektor oaivvilda ge dán vuogi buoremus oahpahanvuohkin mii maid lea hui lahka ođđa oahppoplána mas čiekŋudanoahppan deattuhuvvo.
Jáhkkit dát vuohki maid Guovdageainnu nuoraidskuvla lea válljen lea hui buorre vuohki oahpahit árbevirolaš bargguid skuvllas, ja maiddái nanne skuvlla oahpahusa eará fágain. Oahpahusas deattuhuvvo dávjá ahte máná iežas duogáš, diehtu, máhttu, árgabeaivi ja kultuvra galggašii leat vuođđun oahpahussii skuvllas. Dát bargovuohki maid Guovdageainnu nuoraidskuvla áigu geahččalit dahká ge juste dán. Dáid bargguid bokte nannejit ohppiid giela, sin gullevašvuođa sámi eallinvuohkái ja leat mielde sirdimin árbemáhtu buolvvas bulvii. Lea juo sámi sátnevájas mii dadjá ahte bargu lea buoremus oahpaheaddji, ja dan ovdalii go dušše girjjiin lohkat ja govaid geahččat, de besset oahppat ieža vásihit ja geahččaladdat. Praktihkalaš barggut ja árbevirolaš máhttu ja diehtu sáhttet maid nannet eará fágaid oahpahusa, nugo ovdamearkka dihte luonddufágas ja matematihkas. Mánáide lea álkit ipmirdit ođđa ja váttis fáttáid, go vuođđun lea sin iežaset duogáš ja árgabeaieallin. Sámi skuvllas lea ge erenoamáš ovddasvástádus das ahte oahppit ožžot oahpu sámi árvvuid, sámegiela, sámi kultuvrra ja sámi servodateallima vuođul. Nuoraidskuvlla prošeakta lea hui buorre ovdamearkan dasa mo dan sáhttá dahkat.
Lea juo sámi sátnevájas mii dadjá ahte bargu lea buoremus oahpaheaddji, ja dan ovdalii go dušše girjjiin lohkat ja govaid geahččat, de besset oahppit ieža vásihit ja geahččaladdat