Áiggiid čađa alimus guosselohku
Davvi-norgga Dáiddamusea illuda go guosselohku lea lassánan 27 proseanttain diibmá, ovddit jagi ektui.
Leat ollugat geat fitne Sámi Dáiddamusea čájálmasas ja muđuid lea ollu doaimmat leamaš mannan jagi mii dagaha ahte guosselohku lassánii 27 proseanttain.
2017:s ledje 32 054 olbmo geat fitne Davvi-norgga dáiddamuseas.
– Mii leat dás gehččiid váste, nu ahte lea hui rámálmas oaidnit ahte mii lihkostuvvat olahit nu ollugiidda, muitala direktevra Jérémie Mcgowan preassadieđáhusas.
Joatkit buriid vásáhusaiguin
Njukčamánu, cuoŋománu ja miessemánu lei stuorimus lassáneapmi, mii deaivá leat dan áigge go Sámi Dáiddamusea museačájáhus «There Is No», mii lea geasuhan eanemusat gehččiid áiggiid čađa.
Juohke mánu 2017:s ledje ollu guossit museas, earret go golggotmánu go musea lei gitta guokte vahkku ja juovlamánus.
– Dakkár logut movttiidahttet ja oaivadit min joatkit buktit buriid vásáhusaid buohkaide. 2018 šaddá vel buoret, muitala Mcgowan.
Boares olahusa cuvken
2014:s fitne 26 609 olbmo dáiddamuseas. Lei dat jahki go musea vuittii Dáiddakritihkkarbálkkašumi ja Peder Balke čájáhus lei stuora sukseassa.
– Go cuvkkiimet dan boares olahusa 20 proseanttain, de leat jo hirbmat rápmásat dainna 2017:s, čállá Davvi-norgga Dáiddamusea preassadieđáhusas.
Lassin leat guosselogut Kunsthall Svalbard Longyearbyenis, feastariemuid čájáhus Subsistence Hársttáin ja eará doaimmat muđuid.
annegro@avvir.no