Stuora beroštupmi divodit kulturmuittuid
Kulturmuitofoanda lea 15 jagis oahpahan man dehálaš lea suddjet boares visttiid ja divodit daid geavaheami dáfus.
Kulturmuitofoanda deavdá 15 jagi 2018:s, ja dan oktavuođas muitala Kulturmuitofoandda direktevra Simen Bjørgen, ahte maŋemus jagiid lea ipmárdus čuožžilan ahte kulturmuittuid ferte geavahit vai daid suddje.
– Mii oaidnit ávvujagis ahte beroštupmi divodit kulturmuittuid lea historjjálaš dásis dál. Eat goassege ovdal leat meannudan dán mađe ohcamušaid maid eaiggádat leat sádden go áigot divodit kulturmuittuid, muitala Bjørgen.
– Buorit bohtosat
Ollu eaiggádat leat fuomášan ahte sis lea kulturmuitu, ja dan bokte sáhttet ohcat ekonomalaš doarjaga Kulturmuitofoanddas divodit dan.
– Ollu eaiggádat oidnet ohcamušbarggu vejolažžan čađahit, go Kulturmuitofoanda lea bargan álkidahttit ohcanproseassa maŋemus jagiid. Ja leat buorit bohtosat, muitala direktevra.
Ođđasit ealáskit
Badjelaš 4000 doaimma leat čađahuvvon 2003 rájes go Kulturmuitofoanda álggahuvvui. Ollu doaimmat leat suohkaniin ja ruhta mii juolluduvvo dahká bargguid main lea stuora árvu.
– Juohke jagi divoduvvojit boares kulturmuittut ja šaddet ođđaáigásaš kantuvrrat, idjadanbáikin, guossohanbáikin, fitnodatlatnjan, kulturbáikin, ođasmahtton vázzinbálgán, fanasin mat govdot ja millun mii mille, lohká direktevra preassadieđáhusas.
Son muitala ahte lea miellagiddevaš oaidnit kulturmuittuid mat divoduvvojit, mat rivdet luskkiideamis ja ealáskit ođđasit. Dainna lágiin sihkkarasto maid kulturmuitu viidáset.
Doarjagat lassánan
Seammás go ohcamušat lassánit Kulturmuitofondii, de lasiha ráđđehus stádabušehttii juolludeami. 2018:s lea beali eanet ruhta go 2013:s. Erenoamážit maŋemus jagiid leat politihkkárat lokten supmiid historjjálaš dássái.
– Dat váikkuha ahte eambbogat geat ohcet doarjaga sáhttet vuord- it positiiva vástádusa, 2013 ektui, muitala Bjørgen ja lohká ahte duppaliid nu máŋga kulturmuittut divoduvvojit go ekonomalaš doarjja lea dehálaš divodanbargui. – Mun jáhkán ahte dehálaš oassi politihkalaš vuoruheami ektui, lea go boađus oidno nu bures. Dan dihte ferte giitit daid politihkkáriid geat oidnet árvvu priváhta kulturmuittuid divodit miehtá riikka, lohká Bjørgen preassadieđáhusas.