LKAB áigu automatiseret doaimma
SÁPMI: Ruoŧa ruvkefitnodat LKAB lea plánemin ruvkedoaimma 42 jagi ovddasguvlui dahje jahkái 2060:i, muhto áigu rievdadit doaimma, čállá svt.se.
LKAB nubbijođiheaddji Jan Moström lohká ahte fertejit rievdadit dálá bargovuogi automatiserejuvvon bargovuohkái. Mannan gaskavahku lei ruvkefitnodat bovden Giron, Jielleváre, Julevu gielddaid ja Julevu teknihkalaš Universitehta (LTU) čoahkkimii, gos muitaledje iežaset boahtte áiggi plánaid birra. Dat mielddisbuktá ođđa váldodásiid ja fossiilakeahtes boaldámuša mas ii leat čitnadioksiida. Jan Moström čilgii sii fertejit čuovvut digitála ovdáneami jus galget birget, muđui eai leat doarvái čeahpi gilvalit. Gažaldahkii jávket go bargosajit, de vástidii son ahte dan ii jáhke, muhto jáhkkimis buvttaduvvo beali eambbo go dál dahket.