Sápmi ávvudan 25 jagi
Dán jagi lea 25. Jahki go mii ávvudit Sámi álbmotbeaivvi. Vuosttaš jagiid ledje dušše unna ávvudeamážat muhtun sámi suohkaniin ja ledje maid sii geat oaivvildedje ahte ii leat dárbu, iige oba riekta ge ahte sámiin galgá sierra álbmotbeaivi. Otná Ávviris muitala ge Ole Henrik Magga, gii lei sámediggepresideanta dalle go beaivi vuosttaš geardde ávvuduvvui, ahte dalle lei Sámi álbmotbeaivi stuora balddonas ja sii vásihedje olu vuostefámu. Dalle balle maid álbmotbeaivvi biđget sámi álbmoga. Dál 25 jagi maŋŋel oaidnit ahte dat ballu lei duššás, go sáhttit roahkka dadjat ahte beaivi lea baicce duddjon buori ja nannen sámiid oktiigullevašvuođa.
Ovddeš Sámi Áiggi aviissa váldodoaimmaheaddji Bjarne Store Jakobsen čálii aviissa váldočállosis vuosttaš Sámi álbmotbeaivvi ávvudeami oktavuođas ahte Sámi álbmotbeaivi galggašii šaddat beaivin go mii geahčestit maŋos, gos mii leat vuolgán ja geat mii leat.
Dat lea buorre ráva maid áinnas geardduhit. Mii jáhkkit mii dárbbašit dakkár beaivvi go bisánit, čoahkkanit ja dovdat mo min oktasaš historjá, árbevierut, kultuvra ja giella čatnet min oktii, oktan álbmogin – ja maid ahte mii galgat leat rámis dainna ja váldit vára min oktasaš árbbis. Dat lea maid vuogas beaivi muittášit ja gudnejahttit min ovdavázziid, geat leat áŋgiruššan ja rahčan ovddidit sámi áššiid ja seailluhahttán sámi kultuvrra.
… mii dárbbašit dakkár beaivvi go bisánit, čoahkkanit ja dovdat mo min oktasaš historjá, árbevierut, kultuvra ja giella čatnet min oktii, oktan álbmogin
Otná Ávviris lea mis Sámi álbmotbeaivi fáddán, ja mii geahčestit maŋos vuosttaš jagi ávvudemiide. Olu lea rievdan 25 jagis. Dál ávvuduvvo Sámi álbmotbeaivi viidát ja jagis jahkái álget ain ođđa báikkiin ávvudit ja čalmmustahttit beaivvi. Maiddái olggobealde Sámi riikkaid rájiid oažžut beaivi fuomášumi. Okta ovdamearka dasa leat dat go dán jagi leat vuosttaš virggálaš Sámi álbmotbeaivvi doalut Vancouveris, Kanadas.
Nu lea ge Sámi álbmotbeaivi maiddái doaibman mávssolaš diehtojuohkin- ja oahpahanbeaivin sámi áššiid birra. Go diehtit man unnán skuvllain leat áiggiid čađa oahpahan sámiid ja sámi kultuvrra birra, de lea buot diehtojuohkin ja oahpaheapmi máilmmi dehálaš ja mávssolaš. Dat dáidá ge olu heajos guottuid sámiid birra jávkadan, go dávjá lea diehtemeahttunvuohta mat ealihit ovdagáttuid ja boasttu áddejumiid. Sámi álbmotbeaivvi doalut leat mielde loktemin sámevuođa oidnosii, ja addá buohkaide vejolašvuođa háhkat eambbo dieđuid ja oahpásmuvvat sámevuhtii.
Sávvat buot njealji riikka sámiide lihku Sámi álbmotbeaivái!