Sámi feastakonsearta lág
Sámi feastakonsearta lágiduvvo Riikalávddis Oslos ja lágideaddji ja musihkkár Georg Buljo lea ilus ja rámis go feastakonsearta lea šaddan árbevierrun Sámi álbmotbeaivvi oktavuođas. Olles vahkkoloahpa lágida Riikalávddis sámi feastavahkkoloahpa, gos lágiduvvojit konsearttat ja teáhter.
Dán vahkkoloahpa lea sámi feastavahkkoloahpa Norgga oaivegávpogis Oslos Riikalávddis (Riksscenen). Bearjadaga lágiduvvo Idja - Sámi club night konsearta Resirkulert joavkkuin. Lávvardaga lea stuorra sámi feastakonsearta man Riikalávdi lágida njealját geardde. Dán jagi leat artisttat nu go Johan Anders Baer, Niko Valkeapää ja Emma Eliane Oskal Valkeapää. Musihkkárat geat čuojahit dán eahkeda leat Georg Buljo, Per Willy Aaserud, Helge Harstad ja Tom Rudi Torjussen. Maiddái govvideaddji Jan Helmer Olsen čájeha iežas buktagiid seamma áigge go konsearta lea, galgá maid visuála duogáš lávddis. Neavttár Sarakka Gaup galgá lea konseartta láidesteaddji ja son lohká divttaid gaskkohagaid.
Šaddan árbevierrun
Georg Buljo lea sihke musihkkár ja sámi feastakonseartta lágideaddji ja son iluin muitala ahte dát feastakonsearta lea šaddan árbevierrun go dál lágiduvvo konsearta njealját geardde.
– Juohke jagi leat mii viggan bovdet árbevirolaš ja ođđaáigásaš artisttaid, vai čájehit dan viidodaga mii gávdno sámi musihkas, ja nahkehit gávtti badjelii konsertii ja čiŋahallat dainna. Mus lea dovdu ahte Oslo álbmot ja sámi ássit Oslos liikojit dán konseartafálaldahkii ja dat lea juoidá maid háliidit joatkit. Mu mielas dál sáhttit dán gohčodit árbevierrun go mii leat bargan nu mo leat dahkan, lohká son.
Son muitala konsearttas lávejit leat sullii 200-250 guossi feastakonseartaeahkedis.
Kultuvrralaš viidodat oaivegávpogis
Buljo muitala son vásiha ahte leat stuorra viidodat sámi kulturlágidemiin Oslos Sámi álbmotbeaivvi oktavuođas ja maiddái muđui jagis.
– Lea illodahtti go nagodat ásahit juoidá dáppe Oslos, muhto lea nu ahte sámevuohta sáhttá jáv- kat stuorra gávpogis. Mun dovddan ahte mii leat nagodan dan buoridit oktan ođđa Sámi viesuin ja Riikalávddi iešguđetge sámi konsearttaiguin, ja dál dovddan ahte mis lea buorre sámi kulturbiras dáppe Oslos. Buorit lávddit sámi juigiide ja sámi ođđaáigásaš musihkkii ja maiddái lávdedáidagii, nu go Beaivváš Sámi Našunálateáhter, mii fitná dáppe juohke jagi. Dán jagi lea mis Giron teáhter, mas lea čájehus sotnabeaivvi, ja mas Sarakka Gaup lea mielde. Lea stuorra ja buorre viidodat sámi kulturlágidemiin dáppe Oslos dál, loahpaha lágideaddji ja musihkkár Georg Buljo.
Sámi álbmotbeaivvi doalut Oslos
•Sámi álbmotbeaivve oktavuođas leat olu lágideamit Oslo gávpogis.
•Ráđđeviesus lágiduvvojit jahkásaš doalut gosa Oslo gielda bovde gávpoga sámi álbmoga ávvudit Sámi álbmotbeaivvi borramušain, sártniin ja guoimmuhemiin.
•Sámi mánáidgárdi ávvuda biđđosiin ja gáhkuiguin. Oslo gieldda sátnejođiheaddji Marianne Borgen galleda. Maiddái sáme- ministtar Monica Maeland ja stáhtaráđđi Jan Tore Sanner galledeaba mánáidgárddi.
•Sámi viesus lea rabas viessu ja kafea. Doppe lágiduvvo duodjebádji mánáide, málesguossoheapmi, sártnit ja konsearta ISÁK joavkkuin.
•Sámi meassut duopmogirkus.
•Oslo universitehta ávvuda Sámi álbmotbeaivvi ja dan oktavuođas