– Sámi álbmotbeaivi šaddan festiválan
Sámediggeráđđelahttu lohká ahte vaikke orru leamen nu ahte jagis jahkái leat sullii seammá ollu doarjjaohcamat Sámi álbmotbeaivvi ávvudeami oktavuođas, de ilbmet maid ođđa ohccit báikkiin gos háliidit čalmmustahttit dán beaivvi.
Jahkásaččat oažžu Sámediggi Sámi álbmotbeaivvi doarjjaohcamiid, lea sihke gielddat, searvvit ja eará lágideaddjit geat ohcet ruhtadeame lágidit doaluid. Dássážii ledje boahtán 15 ohcama Sámediggái, ja lea ain vejolašvuohta ohcat go doarjagis ii leat ohcanáigemearri. Jagis jahkái rivdet maid njuolggadusat, dán jagi besset buohkat ohcat ja doarjjajuolludeame sturrodat lea gaskal 10.000 ja 150.000 ruvnnu.
Sámediggeráđđelahttu Henrik Olsen lohká váttis diehtit justa man stuorra supmi juolluduvvo jahkásaččat Sámi álbmotbeaivvi oktavuođas, muhto sivvan dasa čilge leat ahte muhtin doalut leat čatnon festiválaide ja eará doaluide.
– Dál čalmmustuvvo Sámi álbmotbeaivi ollu sajiin, dál orru leamen dábálaš ahte ávvudit máŋga beaivvi, erenomážit gávpogiin vuohttit dan. Sámi álbmotbeaivi lea šaddan festiválain, lea hui illudahtti, lohká Henrik Olsen. Moadde doalu lea fásta doarjjaortnegis, nu mo Álttá sámi vahkku ja Romssa sámi vahkku.
Diimmá juolludeamit
Logut maid Ávvir lea ožžon Sámedikkis, čájehit ahte diibmá ožžo čieža lágideaddji ruhtadeami, oktiibuot ožžo sii 64.000 ruvnnu. Dát ohcamat ledje čatnon njuolgga Sámi álbmotbeaivvi doaluide, soitet eambbo juolludeamit leamašan, muhto Sámediggái leamašan váttis gávdnat loguid go eai leat merkejuvvon Sámi álbmotbeaivin.
Ilbmet ođđa ohccit juohke jagi
Vaikke ohcanlohku ii oro nu ollu rievdamin jagis jahkái, de ilbmet ođđa ohccit báikkiin gos háliidit čalmmustahttit Sámi álbmotbeaivvi.
– Lea dieđusge sii geat jahkásaččat ohcet, muhto orru leamen nu ahte ollugat háliidit čalmmustahttit beaivvi, lea eanet gielddat geat ohcet. Gielddat bovdejit doaluide ráđđevissui, erenomážit dáhpáhuvvá dat gávpogiin. Mun vásihan ahte duos dás ilbmet ođđa báikkiin ohcamat, lohká Henrik Olsen.
Leavga libarda
Su mielas lea illudahtti go Sámi álbmotbeaivi lea šaddan nu stuorisin, ja namuha ahte ii leat guhkes áigi go lei digaštallan man riekta lea levget Sámi leavgga dáža levgenstággui.
– Dál libarda sámi leavga máŋgga gielddas, dat lea hui illudahtti, lohká Henrik Olsen.
Sámevuohta oidnosis
Jagis jahkái stuorru beroštupmi Sámi álbmotbeaivái, beaivi čalmmustuvvo riikaviidosaččat ja Henrik Olsen oaivvilda dat lokte sámevuođa árvvu.
– Čájeha ahte sámevuohta lea oassi riikkas, lohká son.
Ruhtaseahkka unnon
Váikko Sámedikki kulturdoarjja ruhtaseahkka lea unnon maŋemuš jagiid, de lohká Henrik Olsen iežaset vuoruhit Sámi álbmotbeaivvi ohcamiid.
– Mii geahččalat nu bures go sáhttit doalahit ruhtadeami, čalmmustahttin dihtii Sámi álbmotbeaivvi, dat lea hui dehálaš, loahpaha son.