Tromssa násttážat gergosat lávlestit

Báhpajávrri sámeluohkát lágidit máŋga konseartta Sámi álbmotbeaivvi, dasa lassin guoimmuhit maiddái eará doaluin sámi vahkkus. Sii leat dan mađe hárjánan ahte eai šat bala lávket lávdái.

Báhpajávrri skuvllas čudjet oahpes sámi šuoŋat, sámeluohkát leat hárjehallamin Sámi vahkku ja Sámi álbmotbeaivvi konsearttaide.

– Dat lea sihke somá ja veahá láittas hárjehallat. Mii lávlut measta juohke beaivvi ja dalle dolká veahá, dadjá Stella Heim (10).

Árbevierru

Vaikke hárjehallan sáhttá veahá dolkadahtti, de illudit 5. luohká nieiddat čađahit konsearttaid. Tromssa gávpogis lea oainnat šaddan árbevierrun ahte sámeluohkát lávlot Sámi álbmotbeaivvi ja Sámi vahkkus.

– Mii leat dego artisttat sámi vahkkus. Lea hui hušša, ja láve buorre eahkedis nohkkat maŋŋel Sámi álbmotbeaivvidoaluid, dadjaba Stella Heim ja Alina Renate Utsi (11).

Roahkkadat

Sámeluohkáid mánát hárjánit vuosttaš luohkás jo guoimmuhit lávddis. 10-jahkásaš Mia Adina Idivuoma muitala ahte álggos lávii issoras.

– Go ledjen unni, de lávejin hirbmadit ballat lávddi alde. Dál dušše illudan konsearttaide go mii leat nu olu leamaš lávddis, čilge son.

Somámus

Báhpajávrri sámeluohkát guoimmuhit sihke Davvi-norgga universitehtabuohcceviesus, UIT Norgga Árktalaš universitehtas ja Tromssa ráđđeviesus Sámi álbmotbeaivvi. Sámi vahkkus ges dollet konseartta iežaset skuvllas ja Perspektivet museas.

– Mii lávet illudit eanemusat lávlut Sámi álbmotbeaivvi. Dat lea dego min bargu masa hárjehallat olu. Muhtimin oažžut skeaŋkka vel bálkán, oktii beasaimet vuolgit boradit Peppes Pizzai, dadjá Alina Renate Utsi.

Čiŋadit gávttiin

Buot 5. luohká nieiddat dadjet iežaset áigut čiŋadit gávttiin, ja sis leat iešguđetlágan guovllu gávttit. Alina Renate čiŋada Deanu gávttiin, Stella Tromssa gávttiin, Mia Adina Gárasávvon gávttiin ja Sáve Lilja ges Guovdageainnu gávttiin.

– Lea hui somá čiŋadit gávttiin Sámi álbmotbeaivvi go dalle šaddat erenomáš fiidná. Go sámeluohkát leat lávddis, de leat olu iešguđetlágan gávttit oaidnimis, ja olbmot lávejit min dadjat erenomáš čábbáin, dadjá Sáve Lilja Heitmann (10).

kila@avvir.no

Govven: Kila Anti HÁRJEHALLET: Báhpajávrri sámeluohkáid oahppit hárjehallet masá juohke beaivvi ovdal go galget čađahit konsearttaid Sámi álbmotbeaivvi ja sámi vahkkus. Sii leat hárjánan lávddis go Tromssa gávpogis lea šaddan árbevierrun ahte sámeluohkát guoimmuhit.

Govven: Kila Anti ILLUDIT: Sámeluohkáid áldojoavkku nieiddat Stella Heim (ovdda- ja gurutbealde), Mia Adina Idivuoma (ovdda- ja olgešbealde), Alina Renate Utsi (duogá- ja gurutbealde) ja Sáve Lilja Heitmann (duogá- ja olgešbealde) illudit konsearttain lávlut.