Vancouveris maid ráhkkanit ávvudit
Dán jagi leat vuosttaš virggálaš Sámi álbmotbeaivvi doalut Vancouveris, Kanadas. Dása illuda Anne Maia Raanes Sørensen go ii leat viđa jahkái beassan ávvudit sámiid.
Sámi álbmotbeaivvi doalut leat leavvagoahtán maiddái máilbmái, vuohččan leat virggálaš ávvudoalut maiddái Vancouveris, Kanadas.
– Vancouver Skandinávaguovddážis gávdnojit Norgga, Suoma, Dánskka ja vel Islándda lávdegottit, ja buot dáid riikkaid leavggat libardit olggobealde guovddáža. Go eanaš Skandinavia riikkain leat sámit, de lea viehka imaš ahte sámiid leavga ja lávdegoddi váilo. Dán háliidit rievdadit ja vuosttaš lávki lea lágidit Sámi álbmotbeaivvedoaluid. Mu áhkku Karen Sørensen álggahii dán barggu go midjiide lea dehálaš ávvudit Sámi álbmotbeaivvi. Sámi identitehta lea stuora oassin sihke mus ja áhkus, čilge Anne Maia Raanes Sørensen.
Áibbaša ávvudit
Anne Maia Raanes Sørensen lea riegádan ja bajásšaddan Romssas, muhto maŋimuš vihtta jagi lea ássan Vancouveris Kanadas. Doppe ássaba maiddái su áhkku ja áddjá geat leaba sámi sogalaččat.
– Mun in leamaš ruovttus Sámi álbmotbeaivvi dan rájes go fárrejin deike, nu ahte váillahan ávvudit Sámi álbmotbeaivvi. Dál illudan sakka doaluide vaikke dáppe dieđusge šaddet veahá eará lágan doalut go Romssas, dadjá Anne Maia.
Girjás prográmma
Vancouveris ávvudit sápmelaččaid dán vahkkoloahpa, namalassii guovvamánu 3. ja 4. beaivvi. Sihke dáiddačájáhus, logaldallamat, filmmat ja musihkka leat oassin prográmmas. Earret eará logaldallá Dr. Troy Storfjell sámi historjjá ja kultuvrra birra. Julie Whihtehorn sáhkavuorus ges šaddá sáhka sámi ruohttasiid suokkardallama birra. Eará logaldallamat ges gieđahallet áššiid ja historjjáid mat áitet sámi giela ja kultuvrra. Lávvardaga guossohit maiddái sámi biepmu gussiide, olbmot besset návddašit sihke luosa ja bohccobierggu.
– Mállásiidda leamaš stuora beroštupmi, dássážii leat badjel 50 olbmo dieđihan ahte bohtet. Bohccobierggu man guossohit boahtá Mikkel Pulk áddjuba Lloyd Binder ealus Tuktoyaktukas. Dát eallu bođii Sis-finnmárkkus Davviamerihkkái 1898:s, muitala Anne Maia Raanes Sørensen.
Čiŋada gávttiin
Sámi álbmotbeaivvedoaluide čiŋada Anne Maia gávttiin, ja dáinna gal čevllohallá son.
– Mu risteadni, Máret áhkku, dahje Máret Sárá lea gorron munnje gávtti. Vuorddán oažžut gávtti dáid beivviid Vancouverii. Mun illudan sakka dainna čiŋadit go mus ii leamaš iežan gákti dan rájes go ledjen mánná. Dat gal šaddá hui erenomáš, loahpaha son.
Sámi doaluid oktavuođas plánejit maid ásahit sierra sámi searvvi Vancouverii, boahtá ovdal Sámi álbmotbeaivvi prográmmas.
kila@avvir.no