Gearggus GUODDALIT jus ferte
Jus Ottar Anti vuoitá ášši dikkis orohaga vuostá, de sáhttá geavvat ahte šaddá gorrelogu mielde unnideapmi Lágesduoddaris. Lágesduoddara advokáhtta čuoččuha ahte lága ulbmil ii leat leamaš ahte okta galgá sáhttit gomihit orohaga plánaid.
Lágesduoddara orohaga boazodoalli Nils Per Ottar Anti lea geassán iežas orohaga diggái, go oaivvilda sis ii leat riekti ráhkadit unnidanplána mas muhtumat lasihit ja moattes galget visot orohaga unnideami gillát.
Váikkuhusat
Lágesduoddara advokáhtta, John Jonassen, lohká ahte vuolgá das hui olu movt duopmu šaddá áššis. Son lohká ahte jus duomus celko ahte duššin dahket doaibmanjuolggadusaid, de ferte orohat dušše ráhkadit ođđa doaibmanjuolggadusaid, earret eará ođđasit meannudit boazologu ja sáddet ášši gulaskuddamii.
– Jus diggi addá Antii earenoamáš rievtti atnit eambbo bohccuid go oktage eará orohagas, de lea čielggas ahte de fertet mii várra guoddalit ášši lágamánniriektái, lohká son.
Muhtumat juo unnidan
Jonassen lohká ahte nu go dál orru Anti bealis čuoččuhus, de galgá son sáhttit caggat ja bissehit orohaga plánaid, earret eará man olu bohccot galget leat vai olihit eiseválddiid mearriduvvon orohatlogu.
– Doppe leat juo olbmot unnidan ja geargan, eai ge sii soaitte nu bearehaga movttáskit jus Anti beassá bisuhit iežas boazologu go sii leat juo unnidan, lohká son.
Ii ovttaoaivilis
Ottar Anti advokáhtta, Per Arve
Amundsen, lohká ahte su klieanta ii leat álggu rájes leamaš ovttaoaivilis ahte galgá beliin iežas ealu unnidit vai eanas siidaoasit orohagas fas besset lasihit bohccuid.
– Ii lea das sáhka mii sáhttá geavvat, muhto lea go orohagas riekti mearridit boazologu buohkaide jahkečoahkkinmearrádusa bokte vai ii. Jus ii leat riekti, de lea dikkis vuođđu cealkit ahte ii leat lobálaš mearrádus leamaš, lohká Amundsen.
Duorastaga dikkis duođaštuvvui ge ahte ledje dušše čieža siidaoasi jahkečoahkkimis gos mearriduvvui boazolohku Lágesduoddara siidaosiide.
Duođaštuvvui dikkis
Amundsen maid lohká ahte duorastaga dikkis duođaštuvvui ge ahte eiseválddi vuogádat lea ahte jus ovttamađe logu buohkaide mearridit, de lea vejolaš eanetlogu mearrádusain dan mearridit. Jus iešguđetlágan boazolohku mearriduvvo, de galgá ovttajienalašvuohta.
– Mu klieanta ii leat mieđihan orohaga unnidanplánii, ja danin ii leat dat lobálaš. Dat bođii ge čielgasit ovdan dikkis dál, lohká Amundsen.
Eai dárbbat unnidit
Son muitala ahte diehttelasat ii vearrábun gal šatta su klientii go ahte šaddá unnidit 650 heggii jus vuoittáhallat dikkis, muhto ii leat das ge sáhka.
– Eai leat eambbo viđas – guđas geat galget unnidit, muđui earát orohagas besset lasihit boazologu, ja dalle ii leat šat unnidanplána, lohká son.