Balddihahtti dáhpáhus
Dán vahkos ilmmai filbma mii lea filbmejuvvon skuvllas Guovdageainnus, sisdoallu lea nu roavis ahte vel riikkamediat ge čállet dan birra. Filmmažis, mii maid lei juogaduvvon sosiála mediaide, oaidnit bártnážiid mat orrot doarrumin. Sihke stuolut ja skuvlabeavddit bálkestuvvojit ja boađus lei sáhttit šaddat viehka duođalažžan go ledje sáhttit garrasit roasmmehuhttit guđetguoibmádeaset.
Mii diehttelasat eat dieđe mii lea dáhpáhuvvan, leago dát eaŋkildáhpáhus vai givssideapmi. Politiijat leat gal lohkan medias ahte ii mihkkege čujut dasa ahte sii geat leat filmmas, leat dahkaluddamin. Mo dal jo leaš, de dát filbma goittot ge boktá balu, sihke mánáid ja rávesolbmuid gaskkas, go skuvla galggašii leat oadjebas báikin buohkaide.
Dat mii lea liige balddihahtti lea go mánát juhket dákkár videoid sosiála mediaide, gos de ožžot maiddái doarjaga muhtimiin.
Ii leat amas ášši ahte nuorat juhket dákkár videoid, vaikke ii leat ge dássážii leamaš nu dábálaš Sámis gal. Miehtá máilmmi leat dákkár filmmat juogaduvvon sosiála mediaide jo guhkit áigge, gos nuorat leat sihke ovddalgihtii šiehtadan doarrut ja filbmet dan, muhto maiddái lea dáhpáhuvvan ahte rohkkáhit olbmuid gáhta alde geat eai leat vuordimin ge dan, dušše vai besset filbmet. Dákkár treandda diehttelasat ii hálit oktage ahte galgá leavvat eambbo.
Danne leage hui dehálaš ahte buot instánssat gieđahallet dákkár áššiid duođalaččat. Leage buorre oaidnit ahte sihke skuvlla, suohkana ja politiijaid bealis atnet ášši duođalažžan. Sátnejođiheaddji dadjá ge Ávvirii ahte filbma lea surgehan buohkaid.
Sátnejođiheaddji muitala ahte son gohčču politiijaid, skuvlajođihangotti, váhnenlávdegotti ja ohppiidráđi čoahkkimii, gos galget digaštallat ášši. Seammás lohká leat lunddolažžan geahčadit rutiinnaid go dákkár ášši čuožžila, geahččat lea go mihkke maid livčče sáhttit eará ládje bargat, ja váldit oahpu das mii dáhpáhuvvá.
Leage buorre oaidnit ahte sihke skuvlla, suohkana ja politiijaid bealis atnet ášši duođalažžan.