– In leat veahášge duđavaš
Gaskavahkku šadde Sámedikki stivrralahttut Fefos čilget sámediggeráđđái manne manahedje jođiheami fylkkadiggái. Muotka lohká dili leat duođalažžan.
Gaskavahkku deaivvadedje Sámedikki Finnmárkkuopmodaga (Fefo) stivrralahtut Marit Kirsten Anti Gaup (Bb), Mathis Nilsen Eira (NSR) ja Máret Guhttor (NSR) sámediggeráđđelahtuin Silje Karine Muotkain ja parlamentáralaš jođiheddjiiguin Runar Myrnes Baltoin (NSR) ja Ronny Wilhelmseniin (Bb). Ulbmil Sámediggeráđi bealis deaivvadit, lei dieđusge oažžut dieđuid stivralahtuin mii dáhpáhuvai go dákkár dilli čuožžilii.
Miellagiddevaš dieđut
Siskkaldas čoahkkimis Sámedikki Fefo stivrralahtuiguin beasai Muotka gullat iešguđetlágan čilgehusaid manne dilli lea čuožžilan.
– Mun ožžon dieđuid mii lea dáhpáhuvvan doppe, muhto dat lea dieđusge dan láhkai ahte sis leat iešguđetlágan muitalusat, mo dilli lea čuožžilan. Miellagiddevaš dieđut, dadjá son.
Vurdet ahte dilli čorgejuvvo
Muotkas leat dieđut sihke sámediggepresideantta bealis ja maid- dái áirasiin.
– Son vuordá ja mii vuordit dieđusge ahte dilli čorgejuvvo. Deháleamos lea ahte dat bargo Finnmárkkulága ektui ja ahte sihkkarastejuvvo ahte dat čuovvoluvvo, čilge Muotka. – Lea go luohttámuš stivralahtuide?
– Dieđusge gullá dievasčoahkkimii árvvoštallat juste dien beali, mu rolla lea buktit dievasčoahkkimii dan dárbbašlaš dieđu. Sii fertejit dahkat dan maid fertejit, vástida Silje Karine Muotka.
– In leat veahašge duhtavaš
Muotka atná dilii duođalažžan ja livččii sávvan Sámedikki beassat jođihit Fefo.
– Mun gal in leat duhtavaš in veahášge, dá lea duođalaš dilli. Dá livččii dehálaš rolla systemas, go Fefo jođiheapmi mielddisbuktá ahte lea dat riekti čielggadit áššiid go geavaha duppaljiena. Nu ahte min sávaldat ráđi bealis lea ahte go Sámedikkis lea vejolašvuohta
Eaŋkilit čilgen
Stivrralahttu Máret Guhttor (NSR) muitala sin hui eaŋkilit čilgen mii dáhpáhuvai, ja manne dilli čuožžilii. Mo čoahkkimiin manai, dan lea váttis dadjat.
– Dál manná ášši Sámediggái, ja de in dieđe šat mo manaš, sii doppe árvoštallet mo doppe barget, vástida son.
– Sihke Silje Karine ja munno Máhtiin (red. meark: Mathis Nilsen Eira) mielas lea dieđusge šállošahtti go ná manai, muhto dál lea beare oaidnit mii Sámedikkis boahtá. – Maid lehpet čilgen?
– Mii čilgiimet dan mii dáhpáhuvai, muhto dan gal in šat hálit kommenteret, dál lea ášši Sámediggeráđi gieđaid gaskkas.
– Balat go ahte ovddiduvvo eahpeluohttámuš didjiide?
– Luohttámuš- dahje eahpeluohttámušvuohta ii gula munnje, muhto Sámediggái. Dan gal in sáhte dadjat ahte mun balan das, muhto dat gal dieđusge sáhttá dáhpáhuvvat. Die lea dakkár spekulašuvdna, in sáhte spekuleret dál, loahpaha Sámedikki Fefo stivrralahttu Máret Guhttor.
ingermarita@avvir.no