Ii vel ožžon ruđa Sámi dáiddamuseai
Anne May Olli lohká ožžon signálaid ahte lea dehálaš oažžut sadjái sierra sámi dáiddamusea.
– Signálat ja dáhttu lea buohkain buorre, muhto dađibahábut ii leat oktage politihkkár várren ruđa Sámi dáiddamusea huksemii, lohká RidduduottarMusea direktevra Anne May Olli.
Son lohká lea hui dehálaš ahte riikapolitihkkárat vuoruhit fitnat museas guossis.
– Mu mielas lea hui dehálaš ja buorre go vuoruhit boahtit geahččat makkár hástalusaid birra mii hállat. Besse oaidnit vistti man háliidat doalahit, seammás besse oaidnit makkár hástalusat visttis leat, go lea sáhka sajis, lohká Anne May Olli. Sámi Vuorká-dávviriid (SVD) vistti Kárášjogas háliidit bisuhit, vaikko visti lea beare unni dálá doaimmaide, sávaldat lea ođasmahttit dálá vistti.
– Mii sávvat ahte sierra dáiddamusea huksejuvvo, muhto ahte huksejuvvo seamma šilljui go SVD visti. Galget leat guokte sierra musea, dadjá Olli.
Hástalus váldit vuostá dávviriid
Anne May Olli lohká nu go dál lea dilli, de lea stuorra hástalusat váldit vuostá Bååstede vuorkká. Bååstede prošeavtta ulbmil lea sámi kulturárbbi máhcahit ruovttoluotta sámi museaide. Šiehtadusa mielde galget sullii 2000 dávvira máhccat ruovttoluotta guđa sámi museii, Sámedikki hálddašeami vuolde. Dál ii leat vel čielggas man olu dávviriin máhcahuvvojit RDMSVD:II.
inga@avvir.no