Hástala árgabeai´ juigiid juoiggastit Snapchatas
Anne Randi Solbakkena mielas gullo árgabeaivveluohti beare unnán, ja háliidii dan čalmmustahttit. Dan son dahká Snapchatas, gos ođđa olmmoš galgá juoiggastit juohke beaivvi.
Árgabeaivvis ii gullo doarvái luohti. Dan goit oaivvilda Anne Randi Solbakken, ja dan dihte ásahii ge son konto Snapchat sosiála mediai, gos luohti galgá gullot.
– Lei soames gii fuoikkui ahte luohti ja sámi musihkka ii gullo, ja mun jurdilin ahte gal dakkár konto sáhtášii Snapchatii ásahuvvot. Ásahin suohttas dihte, ja muhtun dat ferte álgit. Ja nu dat vulggii, čilge Anne Randi Solbakken.
Stuora beroštupmi
Juohke beaivvi galgá ođđa olmmoš stivret konto, ieš juoigat dahje juoiggahit earáid seammás go filbme ja juogada dan buohkaiguin geat čuvvot.
Solbakken lohká ahte lea hirbmat olu beroštupmi leamaš, ja jándoris ledje birrasii 200 olbmo čuovvugoahtán konto.
– Olbmot leat áŋgirat, muitala son.
Álggahii luđiin
Anne Randi Solbakken muitala ahte sutnje lea luohti álo leamaš dehálaš, vaikko ieš ii mánnán oahppan juoigat.
– Áhkkorohkkái leat hui liegga muittut go mánnán lávejin buđaldit, ja áhkku lávii huradit. Dat rytma lea bisánan váibmui, čilge son.
Ieš son álggahii ge juoigan-snapa, ja rohttestii máŋga luođi.
– In leat roahkkat juoigat, muhto mus ii leat gudni nu stuoris ahte balan hehppeheames iežan. Jus mun duosttan, ammal de earát maid dustet, lohká Solbakken.
– Neahtas álkit
Anne Randi jáhkká ahte olbmuide lea álkit duostat juoigat go lea neahta bokte, ii leat jur liikká issoras go lávdái čuoččohit.
– Mii diehtit ahte digitála máilmmis lea olu álkit go njunnálaga. Jurddašan ahte váldoulbmil lea oažžut luođi oidnosii árgabeaivvis. Luohti gullo meassuin ja lávddiid alde, muhto nuorat buolva juoigá maid árgabeaivvis, lohká son. Son lohká ahte eanaš juoigit eai leat almmuhan Cd-skearru, ja son háliida dan árbbi juogadit, árgabeailuođi. Snapkonto gávnnat jus ozat Juoiggas ja go de leat dohkkehuvvon čuovvut dan, de beasat gullat luđiid.
– Dán áigge eai šat cuiggot
– Jáhkán áigi lea ollen dan dássái ahte eat cuiggot šat, lohká son ja muittaša go lei nuorra nieiddaš. Mánnán gulai go olbmot digaštalle luđiid, ja hupme geat máhttet juoigat, ja gos máhttet juoigat.
– Lávejedje lohkat ahte kárášjohkalaččat eai máhte juoigat, sii lávlot, muitala Solbakken, geas lea gullevašvuohta sihke Kárášjohkii ja Guovdageidnui.
– Jáhkán dál lea eambbo áddejupmi man olu iešguđet vuogit leat guovllus guvlui, ja sávan ahte snapkonto dan čájeha áiggi mielde, čilge son.
sara.maret@avvir.no