Buot golbma áirasa berrejit árvvoštallat
Sámedikkis lea oalle roassu dál, go stuorámus bellodat, Norgga Sámiid Riikasearvi (NSR), háliida lonuhit Bargiidbellodaga nammaduvvon Finnmárkkuopmodaga (Fefo) stivraáirasa Marit Kirsten Anti Gaup, gii lea Bargiidbellodaga (Bb) áirras. Dan moiva dillái lea sivva, go Sámedikki golbma nammaduvvon áirasat Fefo stivrras eai nagodan gaskaneaset soahpat stivrajođiheaddji. Dan dihte dáhtui mannan vahkkus Sámedikki guokte stuorámus bellodaga sin golbmasa boahtit čilget mii lea geavvan. Stivrralahtut Marit Kirsten Anti Gaup (Bb), Mathis Nilsen Eira (NSR) ja Máret Guhttor (NSR) deaivvadedje sámediggeráđđelahtuin Silje Karine Muotkain ja parlamentáralaš jođiheddjiiguin Runar Myrnes Baltoin (NSR) ja Ronny Wilhelmseniin (Bb). Ulbmil Sámediggeráđi bealis deaivvadit lei dieđusge oažžut dieđuid stivralahtuin mii dáhpáhuvai go dakkár dilli čuožžilii.
Muotka muitalii Ávvirii mannan vahkkus iežaset ožžon dieđuid, muhto Fefo áirasiin ledje su dieđuid mielde iešguđetlágan muitalusat. De orru ge dakkár dilli ahte dán rádjái ii leat vel boahtán albmosii mii duođaid lea geavvan. Earret eará manne Sámedikki áirasat eai leat nagodan oktasaš stivrajođiheaddji nammadit. Seammás han mii diehtit ahte Marit Kirsten Anti evttohii iežas, muhto NSR áirasa guovttos, Mathis Nilsen Eira ja Máret Guhttor, ges evttoheigga Finnmárkku fylkkadikki áirasa Raymond Robertsena (Olgešbellodat) jođiheaddjin, ja son oaččui ge vihtta jiena. Namalassii fylkadiggeáirasiid ja NSR jienaid. Eará sániiguin, de leat NSR áirrasguovttos addán fámu Fylkadiggái. Dat lea fakta mas NSR ii beasa ii basa ge eret.
Dat lea fakta mas NSR ii beasa ii basa ge eret.
Ávvira dieđuid mielde aŋkke lea dál NSR bargagoahtán dan badjelii ahte bálkestit Bargiidbellodaga Marit Kirsten Anti Gaup eret Fefo stivrras. NSR galgá maid gáibidan, ahte Bargiidbellodat ieš bidjá eret sin áirasa. Jus dan eai de daga, de NSR árvvoštallá bálkestit Bargiidbellodaga eret Sámedikki dievasčoahkkinjođiheaddji ámmáhis mas lea Elisabeth Erke. Dát dieđus lea dál haksogoahtán dakkár duolva politihkalaš speallun, muhto iešalddis lea ášši hui duođalaš go Sámedikkis ii leat dan áigodagas jođiheaddji. Liikká eahpidat ahte dat lea dušše Bb áirasa sivva. Dan han ferte muitit ahte das leaba maid mielde NSR áirasat, muhto sudno orru NSR ráfáiduhttán. Manne dan dahket, ii leat buorre dadjat, go vihkkut man garrasit rohkkáhit ovtta áirasa. Dan áššis aŋkke bidjat mii stuorra gažaldatmearkka dasa manne eaba goasse NSR áirasatguovttos ovddidan nuppi sudnos jođiheaddjin válggas. Dat lea stuorra imašin báhcán, go de goit livčče geahččalan oažžut jođiheaddji. Dan ektui divvut jearaldaga, ahte lea go okta sis dohkálaš čohkkát Fefo stivrras. Dan ovddasvástádusa ferte maiddái NSR ja dieđus olles dievasčoahkkin maid árvvoštallat, ahte galget go molsut buot golbma áirasa eret.