– Luohti movttiidahttá jus olmmoš lea heajos mielas
John André Eira lea juoigan olles eallenagi, beaivvi álggus beaivvi lohppii. Diibmá son searvvai Sámi Grand Prixii vuosttaš geardde, ja vuittii maid. Dál son searvá nuppes, ja áiguge juoigat neabis Joakim Olsena.
Luođi lea John André Eira vilbealli, John Máhtte Utsi, bidjan. Luohti heiviige hui vuohkkasit Joakima persovnnalašvuhtii.
– Ii leat beare jođánis ii ge beare njoazes luohti, ja mu mielas heivii dat hui vuohkkasit Joakimii.
Juoigagođii ovdal go hupmagođii
John André muitala ahte luohti lea sutnje álo leamaš hui dehálaš. Son lea ieš soames luođi bidjan, ja luohti lea dego dálkkasin šaddan sutnje.
– In astan juoigat jur dalle go riegádin, muhto álgen goit juoigat veahá ovdalaš go hupmagohten, dadjá son.
Luohti movttiidahttá
Go jearan maid luohti mearkkaša sutnje, de ádjána oanehaš gávdnat sániid dasa.
– Lea váttis čilget maid luohti mearkkaša munnje, muhto dat lea dakkár mii movttiidahttá hirbmadit. Dat lea gudnejahttin, muhto Namma: John André Eira Ahki: 26
Luohti: Joakim Olsen Searvan oktii ovdal
Mázes eret
maiddái nu jus veahá heajos mielas lea, ja go de ieš okto juoiggada, de movttáska. Dat lea dušše okta unna oasáš luođi čilgemis, muitala John André.
Ii váldde nu jierrásit
John André ii dieđe lea go eambbo gelddolaš dán jagi searvat diimmá ektui, muhto áigu goit geahččalit juoigat liikká bures go diibmá. Son ii váldde nu jierrásit, ii ge loga gal iežas nu balus.
– Gal dat vuolgá vuos makkár miellalágis lean dan beaivvi, nu ahte gal dat šaddá nu go šaddá. In jáhke gal vuoitit, muhto in dan gal jáhkkán diibmá ge, lohká son gilvvu birra.
John André ii loga iežas šaddan iskat geat leat mielde juoiganoasis dán jagi, nu ahte ii dieđe man alla dássi dat lea. Go muitalan sutnje geat galget juoigat Sámi Grand Prix lávddi alde, de dadjá son:
– Vuoi, de gal gusto lei oalle alla dássi. Olu čeahpes juoigit, šaddá garra gilvu!