Ieš dovdá dan ánssášan
Porsáŋggu gielda ávvudii Mari «Spellemanngudnebálkkašumi»
Maŋŋebárgga eahket ávvudedje dán jagáš Spellemann gudnebálkkašumi vuoiti Mari Boine Sámi giella- ja kulturguovddážis, Leavnnjas Porsáŋggu gielddas. – Dovddan ieš maid ahte ánssášin dán bálkkašumi, dadjá Mari Boine.
Maŋŋebárgga eahket ávvudedje dán jagáš Spellemann gudnebálkkašumi vuoiti Mari Boine Sámi giella- ja kulturguovddážis, Leavnnjas Porsáŋggu gielddas.
Guovvamánu 25. beaivvi oaččui Mari Boine Spellemann gudnebálkkašumi go lea okta dain dovdoseamos sámi artisttain ja lea badjel 30 jagi doaibman artistan. Beaivvi maŋŋá lei Mari Boine mielde TV2 dovddus Tv-ráiddus «God Morgen Norge», gos bođii ovdan ahte lei galgat ovdal oažžut dán bálkkašumi, muhto dan ii loga Mari iežas galgat.
– Dál lei áigi laddán. Dat mii lea somá lea ahte mu álbmot maid illuda, mii ovttas illudat. In leat dušše mun, muhto ahte maid olbmot oidnet dan barggu. Jo mun lean iežan dihtii bargan, muhto in dušše iežan dihtii, dadjá Mari Boine.
– Somá go ollugat ledje boahtán
Porsáŋggu gielda lei skeŋken ávvudandoaluid gosa ledje bov- den birrasii 50 guossi, Mari Boine bođii ávvudoaluide iežas bearrašiin, gándaguoktáin ja áhkkutguoktáin. Muđuid ledje skihpárat, fuolkkit, oappát, oahppásat ja politihkkárat bovdejuvvon doaluide.
– Hui somá go nu ollugat ledje boahtán. Lea hui somá go Porsáŋggu gielda gudnejahttá ja illuda go mun ožžon dán gudnebálkkašumi, dadjá Mari Boine.
Illudahtii go sámástii
Porsáŋggu sátnejođiheaddji Aina Borch rabai ávvudoallosártni sámegillii, ja dat illudahtii Mari Boine. Aina Borch lei hui čeahppi sámástit, guossit illudedje maid go son sámástii.
– Mu mielas lei hui somá go sátnejođiheaddji hálai sámegiela, nu dat galgá ge ovdánit. Ii dušše hállat dan birra, muhto maiddái ahte olbmot ohppet sámegiela, geahččalit dadjat moadde sáni ja čájehit dáhtu oahppat giela. Lei maiddái illudahtti go Kárášjoga sátnejođiheaddji bođii ja attii skeaŋkka munnje, dadjá Mari Boine. Son lei maid ilus go ustibat, bearaš, oappát ja oarpmealit ledje vuoruhan boahtit ávvudit su.
Ain ollu muitalit
Son muitala dál ráhkadeamen sámegielat skearru, ii ge loga iežas plánen heaitit artistaeallimiin. Boahtte jagi ilbmá skearru.
– In leat jurddašan dan vaikko dán bálkkašumi lean ožžon. Mun lean jurddašan lávlut dassái go ii leat šat heagga, go mus lea ain ollu muitalit, čaimmiha son.
Lávlunattáldagat dušše Maris
Stuorraoabbá Anne Kirsten Varsi lea nu rámis ja lohká lea somá go Mari Boine gudnejahtto ruovttugielddas.
– Jáhkán lei movttiidahtti Marii, ja midjiide lea somá oaidnit ahte son lea lihkostuvvan. Mun lean dieđusge vuohttán ahte son lea máilmminásti, son johtá miehtá máilmmi. Juohke sajis lea lihkostuvvan, lohká Varsi, guhte ii loga iežas máhttit lávlut.
– Mus ii leat gal lávlunjietna. Mari lea ožžon buot eatnis, sutnjelea addon dat, iige earáide, čaimmiha Mari Boine oabbá.
Rámis
Lásse Persena, Marin Boine gánd- da, mielas lea somá go olbmot ávvudit su. Son lohká ahte vaikko eadni lea dovddus máilmminásti, de lea Mari Boine sutnje dábálaš eadni ja áhkku su mánáide.
– Mun lean dieđusge rámis, muhto son lea dušše dábálaš eadni. Mánáid mielas lea somá oaidnit áhku TV:S, čaimmiha Lásse Persen.
Ánssášan gudni
Porsáŋggu sátnejođiheaddji Aina Borch mielas lei illudahtti go nu ollugat ledje boahtán ávvudit Mari Boine.
– Son duođaid ánssášii gudnejahttot ja ávvuduvvot. Son ánssášii gudnebálkkašumi iežas erenomáš rahčamušain gaskkustit sámi giela, kultuvrra ja árbevieruid máilbmái máŋgalogi jagi. Son lea riggudahttán Norgga musihkkabirrasa seammás go lea čužžon máilmmi lávddiin ja vuostái váldán dohkkehemiid iežas erenomáš ovdanbuktinnávccaiguin. Dađistaga lea maid dohkkehuvvon iežas olbmuid gaskkas, logai Borch iežas sártnis.