– Jiekŋameara ruovdegeaidnu lea fidnu mii ovddida árktalaš oljobohkama
Suoma stáhtaráđđi dieđihii, ahte dat joatká Jiekŋameara ruovdegeainnu čielggadeami Girkonjárgga-oktavuođa vuođul. Ministtar Berner oaidná, ahte ruovdegeaidnu buoridivččii máŋga davviguovllu ealáhusa eavttuid.
Kritihkalaš
Roavvenjárgga gávpotstivrralahttu, Mikkel Näkkäläjärvi, oaivvilda ahte ruovdegeaidnu vahágahtášii máŋga ealáhusa davvin ja ovddidivččii dálkkádatrievdama. Son čujuha preassadieđáhusas dasa, go suoidnemánus juo 2017 joavku, masa gullet fitnodatmáilmmi hoavddat, almmuhii ahte sii guottihit Jiekŋameara ruovdegeainnu, danin go Barentsábis lea guovtte geardde eanet olju ja gássa go ledje ovdal jáhkán.
– Mus lea kritihkalaš oaidnu Jiekŋameara ruovdegeaidnofidnui, danin go das livčče duođalaš váikkuhusat sámiid árbevirolaš ealáhusaide ja dálkkádatrievdama dustemii. Jiekŋameara ruovdegeaidnu lea iešalddis fidnu, mii ovddida árktalaš oljobohkama. Jus mii háliidit dustet dálkkádatrievdama, eat sáhte leat lasiheamen oljobohkama eandaliige árktalaš guovllus. Jiekŋameara ruovdegeainnu guottiheaddjit galggašedje muitalit maid rehálaččat, ahte guottihit go sii oljobohkama lasiheami, gáibida Roavvenjárgga gávpotstivrralahttu, Mikkel Näkkäläjärvi.
Ekonomalaččat gánnihahtti
Viiddis oainnu mielde Jiekŋameara ruovdegeaidnu ii vealtakeahttá leat ekonomalaččat gánnihahtti. Tuomas Kiiski nákkáhalai 2017:s ja su nákkosgirjji mielde Davvenuortajohtolagas boahtá leat unnán ráktajohtolat Eurohpá ja Ásia gaskka vel guhká. Maiddái Rammannan
bolla ruovdegeaidnočielggadeamis dadjet, ahte obbalohkái ruovdegeaidnooktavuođa sáhttá atnit goluid dáfus hui beaktilmeahttumin, go veardida das man olu ruovdegeainnus lea fievrridandárbu dálá dieđuid mielde.
– Áššedovdit cuiggodit Jiekŋameara ruovdegeaidnofidnu gánnihahttivuođa garrasit. Jos ruovdegeaidnu illá lea gánnihahtti, nu ferte jearrat, ahte manin dát fidnu de veagal ovddiduvvo? Golmma miljárdda euroi gávdno sihkkarit earáge atnu go ruovdegeaidnofidnu, mii ii leat gánnihahtti, dat ovddida dálkkádatrievdama ja hehtte sámiid árbevirolaš eallinvuogi. Sámiid árbevirolaš ealáhusat eai leat dušše barggut, muhto oassi sámi kultuvrras ja eallinvuogis, loahpaha Näkkäläjärvi.