Stuorra beroštupmi sámegielaide Oslos
Sámi viesu giellaguovddážis Oslos lea áigumuš bálvalit buot golmma sámegiela, davvi-, julevja máttasámegiela. Giellaguovddáža jođiheaddji lohká leat olu beroštumi ja dárbbu giellaguovddážii Oslos.
Sámi Vissui lea ásahuvvon giellaguovddáš ja oaivegávpoga giellaguovddážis lea ulbmil bálvalit sihke davvisámegiela, julevsámegiela ja máttasámegiela. Giellaguovddáža jođiheaddji Audun Lona muitala ahte Oslos ii leat leamaš sámi giellaguovddáš ovdal go čakčat ásahuvvui.
– Mis lea ulbmil ahte buot golbma giela galget gullot, muhto dán rádjái in lea ožžon ovttage jearaldaga julevsámegielkurssa birra, muhto máttasámegielkurssa. In dieđe mii doppe lea dál dáhpáhuvvan, leat hui olusat geat leat jearahan goas mii álgit kurssain, dadjá giellaguovddáža jođiheaddji Audun Lona.
Dárbu guovddážii
Son muitala Sámi viessu lea ožžon olu gažaldagaid sámegiela ektui ja dan bokte mearridedje ásahit giellaguovddáža.
– Leat boahtán olu gažaldagat dulkoma birra, giellaveahki birra ja leat juohkelágan giellagažaldagat maid sii leat ožžon. Lea maiddái dieđusge ahte olbmot duođaid dáhttot oahppat giela, hálddahusaid bealis, departemeanttaid bealis, ja gieldda bealis leat golbma dearvvašvuođabargi geat háliidit oahppat nu ahte sii áddejit beaivválaš sámegiela. Čájehuvvo ahte dáppe lea dárbu, dáppe lea visot ja dát lea Norgga oaivegávpot, lohká son.
Buorit áigumušat
Son lohká leat hui movttiidahttin go oaidná nu olu beroštumi, ja davvisámegiela álgokursii leat 26 olbmo dieđihan.
– Mis leat buorit áigumušat, muhto in dieđe movt ruhtademiin šaddá, doaivumis lea dat juo sámediggebušeahtas, nu ahte mii beassat joatkit. Mii leat aiddo álgán ja mis lea leamaš olu bargu álggahit guovddáža. Sávan ahte olbmot geavahit min fálaldaga, ja jus háliidit ovdamearkka dihte oahppat julevsámegiela, de lea dušše váldit oktavuođa minguin, lohká Audun.
Kurssat ja giellakafeat
Maŋŋá beassážiid áigu giellaguovddáš lágidit davvisámegiela álgokurssa. Čakčat lágidit ođđa davvisámegielkurssa, mas lea vejolašvuohta oažžut oahppočuoggáid. Sii áigot maiddái lágidit máttasámegielkurssa čakčat, ja Audun muitala ahte lea hui stuorra beroštupmi máttasámegielkursii.
– Áigut lágidit maiddái giellakafeaid, ja mannan háve go lági- deimmet, de lei namaid birra, veahá humora ja veaháš duohtavuohta. Ledje hui olu sámegielat sehkkejuvvon, vai olbmot besse oahppat mo leat namat huksejuvvon. Ovdamearkka dihte go lei Skuvllabiehttár Ánná birra, manne bođii dat namma ja manne dat namma geavahuvvo, lohká Audun.
Son muitala sis lea plána lágidit giellakafea báikenamaid, luonddunamahusaid ja iešguđetge fáttáid birra gosa logaldallit bohtet ja muitalit fáttáid birra.
– Das ii galgga dušše fáktá, muhto sii geat eai máhte nu olu sámegiela, galget áddet ja maiddái oažžut muitui ođđa tearpmaid, nu ahte geavahuvvojit sámegiel namahusat. Dat lea min ulbmil juohke fáddáeahkedis, lohká son.