Fáhkka girdilii Kanadai
Disdateahket bođii Anne Linii jearaldat man ii dárbbahan guktii jurdilit ovdal diđii maid galgá vástidit.
Maŋŋit disdateahket bođii diehtu Anne Line Guttormai ahte beassá vuolgit spáppa čiekčat ja ovddástit Sámi Árktalaš dálveriemuin (AWG) mat lágiduvvojit Kanadas. Dasa ii lean váttis vástidit.
– Diehtu bođii hui fáhkka
Duorastaga iđđes lei vuolgga Álttá girdišiljus, ja lávvordaga álget doalut Kanadas. Anne Line Guttormas lea badjelaš jándor ráhkkanit.
– Lea hui suohtas vuolgit, muhto diehtu bođii gal hui fáhkka, ikte eahket diibmu logis, dadjá Anne Line, gii jur lea háhppehan rahpat koaffara.
Son galgá čiekčat Sápmi joavkkus futsala.vaikko ná jođánit šaddá páhkkestit biergasiid ja čavget, de illuda dál juo.
– Lea suohtas vuolgit mátkkoštit ja oahpásnuvvat ođđa olbmuiguin, dadjá son.
Beassá vuolgit buozalmasvuođa geažil
Spábbačiekči gii galggai vuolgit lea dieđihan buozalmasvuođa ja dan geažil ii sáhte vuolgit.
Dat dagaha ahte Anne Line oažžu dán vejolašvuođa.
Sávvá birget bures
Sápmi lea daid maŋemus jagiid go leat searvan AWG:I birgen hui bures, ja vuoitán golli olu jagiid. Anne Line ii aŋkke dovdda alla vuordámušaid sidjiide.
– In leat áibbas sihkar makkár vuordámušat mus leat, sávan ahte manna bures ja ahte lea somá. Midjiide leat várra veahá vuordámušat, muhto eai nu alla ahte lea ballu, dadjá son loahpas.