Hábmen musihka luohtái
Ola Stinnerbom lea guhká bargan musihkain, ja lea ge maiddái vuoitán Sámi Grand Prix 2007:s. Dál son searvá goalmmát geardde lávlagiinnis «Sápmi Power».
Son lea ieš čállán ja bidjan nuohta dasa mainna dán jagi áigu searvat Sámi Grand Prixii. Lávlla lea fámu birra mii olbmuin lea leamaš doloža rájes, ja maid mii leat árben iežamet máttuin.
– Dát lea rievttimielde luohti masa lean nuohta heivehan, ja nu dat lea šaddan dát musihkka. Dat lea dan fámu birra mii mis sápmelaččain lea don doloža rájes leamaš, muitala Ola.
Guhká jurddašan ođđasit searvat
Ola Stinnerbom muitala ahte son lea máŋga jagi jurddašan searvat Sámi Grand Prixii fas, go ii leat šat searvan dan rájes go vuittii. Lávlagis, mainna dál searvá, lea namma «Sápmi Power», ja dáinna son lea guhká bargan oažžut gárvvisin.
– Lean máŋga jagi jurddašan searvat ođđasit, ja dán jagi orui heiveme. Lean guhká ádjánan heivehit musihka dán luohtái. Ii lean ulbmil heivehit luođi musihkkii, muhto musihka luohtái, ja danne mun ádjánin guhkit oažžut gárvvisin dan, dadjá Stinnerbom.
Ii leat balus
Ola Stinnerbom lea golbmalogivihtta jagi bargan musihkain, ja danne lea son hárjánan bures dasa. Vuosttaš geardde go searvvai Sámi Grand Prixii lei 2006:s, ja nuppes go searvvai de vuittii. Son lohká ahte dán jagi oassálastet olu čeahpes lávlut dán gilvui, muhto ahte son ii leat nu fokuseren dan.
Go jearan lea go balus ovdal gilvvuid, de vástida son jođánit:
– A-a, dan gal in leat. Lean 35 jagi bargan musihkain, nu ahte mun gal lean nu hárjánan lávddi alde čuožžut.
Olas leat stuora vuordámušat ovdal Sámi Grand Prixa, ja loahpaha ge ná:
– Ii dieđe goasse vuoitá go, vaikko sávvá gal dieđus. Jus pálla ala beassá, de goit sikte beassat vuosttažin, ii ge nubbin dahje goalmmádin. Geahččalan goit dahkat iežan buoremusa, ja sávan vuoitit.