– Jus eai doahttal, de giddejuvvo visot vuodjin doppe
Guovdageainnu meahcástanlávdegotti jođiheaddji ávžžuha dál olbmuid doahttalit gildosa vuodjimis Vuorašvári mielde, ja baicca čuovvut sohppon geainnuid, vai bohccot eai muosehuva.
Guovdageainnu meahcástanlávdegoddi ja Gaup-siida leat soahpan ahte go meahcástanlávdegoddi addá sierravuodjinlobi vuodjit Várenaljávrái ja Čuonjájávrái ja -luobbalii, de ii galgga dat vuodjinlohpi addot Vuorašvári mielde mannat, muhto Vuorašjávrri lulágeahčái ja Nammajávrri bokte.
– Mii leat dál ožžon dieđu ahte doppe lea muhtun vuodján Vuorašvári mielde, ja mannan Čuonjájávrái. Dakko eat leat mii addán sierravuodjinlobi oktiige danin go dakko eat hálit ahte galgá vuddjot, muitala Guovdageainnu meahcástanlávdegotti jođiheaddji, Per Nils Saari.
Buorre gulahallan
Guovlu mas lea sáhka lea Guovdageainnus miilla nuorttaslulás. Vuorašjávri lea hui bivnnuhis oaggunjávri, ja nu leat Várenaljávri ja Čuonjájávri ja -luoppal maid. Muhto Vuorašvárri lea giđabeallái guovlu man Ártni Gaup-siida atná. Várenaljávrái ja Čuonjájávrriide ii mana rabas máđidja, ja danin šaddet dohko ohcat sierralobi vánddardit. Vai ii galgga fertet giddet olles guovllus sierravuodjinlobiid, de leat meahcástanlávdegoddi ja Gaup-siida soahpan ahte nu guhká go eai vuoje Vuorašvári mielde, de lea Gaup- siidda dáfus ortnegis ahte vánddardit lulábeale Vuorašvári.
Giddejuvvo
Per Nils Saari ávžžuha buohkaid doahttalit gokko sierravuodjinlobit leat addon. Jus šadda váttisvuohta, de šaddet sii dahkat juoidá dainna.
– Mii fertet de geassit ruovttoluotta visot sierravuodjinlobiid olles guovllus jus ealu čađa šaddahoahtá johtolat. – Ávžžuhan buohkaid doahttalit dan ja vánddardit lulleleappos ja Nammajávrri bokte, lohká son. – Manin ehpet gidde muhtorjohtolaga guovllus vai eai muosehuhte giđđat bohccuid? – Gaup-siiddas leat sii ieža buktán dan evttohusa, go sin ulbmil ii leat hehttet olbmuid vánddardeames, muhto suddjet ahte sin bohccot eai muosehuhtto dál giđđat. Mu mielas lea mis buorre gulahallan singuin diekko bokte ja danin leat mii maid sirdán gokko addit sierravuodjinlobi, vai ii galgga ealu čađa mannat johtolat. Sávan ahte olbmot maid doahttalit dan maid mii leat ovttas soahpan, lohká son.