Ipmilbálvalus Beaivvášgietti kapeallas
Oktii jagis lea Kárášjoga searvegottis ipmilbálvalus Beaivvášgietti kapeallas.
– Oktii jagis, dán muttus áigge jagis go lea buorre skohtersiivu, de lávet doallat doppe ipmilbálvalusa. Dán sotnabeaivvi, njukčamánu 18. beaivvi diibmu 12.00, de deaivvadit fas Beaivvášgietti kapeallas, muitala Kárášjoga doaibmi gielddabáhppa Jan Høifødt, gean bokte ipmilbálvalus kapeallas lea.
Deaivvadanbáiki
– Lávejit boahtit olu olbmot go mii doallat ipmilbálvalusa Beaivvášgiettis. Olbmot lávejit dolastallat olggobealde sihke ovdal ja maŋŋel ipmilbálvalusa ja dat lea deaivvadanbáiki. Doppe lávejit maid olu bearašolbmot, muitala Høifødt.
Son dieđusge sávvá ahte livččii fiinna dálki vel dan beaivvi. Báhppa deattuha ahte galbmot gal eai dárbbaš girkomannit ballat, go girkoverdde Elen Maria Eriksen gal láve jándora ovdal juo mannat dohko dolastallat ja liekkadit kapealla.