Alla vuordámušat maŋŋel konferánssa
Álgoálbmot Filbmakonferánsa čohkkii lagabui 130 filbmadahkki, ruhtadeaddji ja filbmaealáhusovddasteaddji Guovdageidnui njukčamánu 6. – 9. beaivvi.
Internašunála Sámi Filbmainstituhtas (ISFI) leat konferánssa maŋŋel stuorra vuordámušat álgoálbmogiid ovttasbargui dán suorggis ja dan oaidnit ge stuorra lávkin árktalaš ovttasbarggus, vuosttažettiin dan dihte ahte Árktalaš Álgoálbmot Filbmafoanda ásahuvvui.
Internašunála Sámi Filbmainsti- tuhtta ásahii foandda fárrolaga ovttasbargoguimmiiguin Kanadas, Ruonáeatnamis ja Ruoššas. Dán čállá ISFI preassadieđáhusas man lea almmuhan.
Foanddas ja ovttasbarggus boahtteáigi
Konferánssa oktavuođas čálle vuollái máŋga ovttasbargošiehtadusa ja stuorra oassi ruhtadeamis boahtá dál Kanadas, go earret eará Kanada Mediafoanda (Canada Media Fund), Tele Film Canada ja York Universitehta čálle šiehtadusaid Internašunála Sámi Filbmainstituhtain.
– Dát mearkkaša ahte mii leat nagodan nannet álgoálbmot filbmaovttasbarggu Árktalaš guovlluin nu go jurdda lei ge Arctic Indigenous Film Fundingain ja dát duođašta ahte foanddas ja dákkár ovttasbarggus lea boahtteáigi, lohká Interna- šunála Sámi Filbmainstituhta direktevra Anne Lajla Utsi preassadieđáhusas.
European Film Academy bovdii miellahttun
Maiddái European Film Academy searvvai Álgoálbmot Filbmakonferánsii mannan vahkus. Galledeami oktavuođas dolle sii maid stivračoahkkima Guovdageainnus.
Dál vuordagis lea ge lagat ovttasbargu Eurohpá filbmaindustriijain, go konferánssa okta- vuođas bovdejedje Internašunála Sámi Filbmainstituhta direktevrra Anne Lajla Utsi ja filbmakonsuleantta Liisa Holmberg European Film Academy miellahttun.
– Dat lea stuorra gudni ja nanne sámi ja álgoálbmot filbmadahkkiid oktavuođaid maiddái Eurohpá filbmaealáhusain ja sávvamis dát buktá ollu ovttasbarggu ovddos guvlui, lohká Internašunála Sámi Filbmainstituhta direktevra Anne Lajla Utsi.
annegro@avvir.no